Page 37 - MIN VOS 7 SEPT 2015

A4

LOCALDialuna 7 September 2015

Presupuesto 2016 realistico?

Cifra di entrada y gasto bastante
optimista

Compara presupuesto cu presupuesto semper ta un asunto delicado. Berdad ta cu bo ta
comparando deseo cu deseo, soño cu soño, ilusion cu ilusion, segun e grado di realismo, of e falta
di esey, den e documento. Esey sigur ta e caso cu e presupuestonan di pais Aruba, cu semper
conoce presupuesto complementario (‘suppletoire begroting’) grandi na fin di aña, pa via di
gastonan cu a surgi den curso di aña y cu no tabata presupuesta. Awor claro, bida semper tin
sorpresa y no ta nada di otro mundo si tin desapunto financiero na caminda.
Pero mester por mehora e sistema administrativo pa por anticipa y controla e sorpresanan aki
miho. Otro cos ta ora ta compromete pais Aruba cu cosnan nobo cu no tabata presupuesta y
no tabatin base legal pa gasta placa riba esaki. Pa loke ta aña 2013 Algemene Rekenkamer
ta constata cu tabatin un exceso di gasto (y compromiso) haci cu no tabata contempla ni den e
presupuesto normal, ni den esun complementario.
E institucion aki ta conclui anto cu ta trata aki di gastonan haci cu no ta cuadra cu ley. Ken
mester reacciona den un caso asina? Parlamento, y conociendo e modo di opera di nos Parlamento,
unda e mayoria gubernamental ta tapa tur cos, no ta sucede nada pa coregi e tipo di actuacion
aki. Ban spera cu e mesun cos aki no tuma luga atrobe den e informe di 2014. Pero, mirando
cu gobierno a pone un blafon di gasto di 1350 miyon pa 2014, y finalmente a gasta 1487 miyon
(cifra Banco Central), e miedo ta cu nos lo haya e mesun storia atrobe. Pero, mester tene cuenta
si cu awor tin CAFT operando, cu no ta haci wega den e asuntonan aki, djis mira e experiencia
na nos islanan ruman…
E cifranan provisional di Presupuesto 2015 ta mustra bastante optimista, mirando e cifranan
real di 2014 y di prome mita di 2015 di Banco Central. E cifranan final di 2014 di relato
financiero anual di Algemene Rekenkamer lo no ta mucho aleha di e datonan cu Banco Central
a publica caba pa e aña ey. Gobierno ta spera di yega na gasto total di no mas cu 1335 miyon,
atrobe bao di e famoso blafon di 1350 miyon pa yega na un presupuesto balansa na 2018.
Pa aña 2015 gobierno ta conta cu nos Producto Interno Bruto lo yega 5012 miyon florin,
mientras cu 2014 a termina cu 4768 miyon. Esaki lo significa un crecemento di alrededor di 5%
nominal pa 2015 cu nos no ta mira refleha den e parametronan di economia den curso di e aña
aki. E base riba cual ta bay calcula e deficit pa 2016 ta un GDP di 5203 miyon, cual compara
cu 2015 lo ta un crecemento nominal di 3,8%. Atrobe mester bisa cu esaki tambe ta mustra
sumamente optimista, mirando e rumbo cu nos economia ta move aden. Pa prome mita di 2015
nos por constata caba, a base di informacion di Banco Central, cu entrada di impuesto a cay
entre 2 pa 3%, compara cu 2014. Den su “Speerpuntennota” gobierno ta conta cu un crecemento
fuerte di impuesto tanto directo como indirecto na 2016 en comparacion cu 2014 y 2015.
E impresion ta cu aki ta trata di loke na Hulandes nan ta yama “jezelf rijkrekenen”. Un
ehemplo: na 2014 BBO a trece aden Afl. 93 miyon y na 2013 apenas Afl. 92 miyon. Den prome
mita di 2015 BBO tabata Afl. 1,4 miyon mas cu aña pasa. Awor, diripiente ta spera un suma
total di BBO di Afl. 112 miyon, un crecemento considerabel cu, manera a bisa caba, nos no ta
mira refleha den e anda di nos economia awor. Of mester ta cu tin aumento na caminda, si e
introduccion di e ABB bay camufla cu tin mas entrada cu anteriormente cu e BBO na 1,5%?
Tambe den e aspecto di gasto nos ta mira un diferencia grandi entre loke ta presupuesta y
loke finalmente ta gasta. Un bon ehemplo di esey ta gasto di personal di gobierno. Na aña
2014 a presupuesta 373.9 miyon pa salario di empleado publico, y a gasta finalmente 393.9
miyon. Aki nos ta mira cu e ganashi cu tabatin cu a uza e reforma di e fondo di pension
(APFA) parcialmente pa paga mas na salario. Di manera cu no ta mira nada ainda di e famoso
‘halvering arbeidscontractanten en natuurlijk verloop’, un di e famoso 24 medida cu lo a tuma
pa baha gasto. Mientras tanto , a pone pa aña 2015 un suma di 359.6 miyon y pa 2016 358
miyon pa salario di empleado publico. Ban mira si na fin di aña atrobe ta aparece un abismo di
como 20 miyon entre deseo (soño, ilusion) y e realidad di e cuenta berdadero.
Den e simannan nos dilanti Bon Dia Aruba lo bay dedica atencion extenso na e topico di
presupuesto 2016. Keda pendiente!