Page 36 - Awemainta

36 AWEMainta Diabierna, 08 April 2016

Sv Britannia Bright
Bakery/Gatorade ta
gana Ind. Caravel cu
tremendo 5-1

DIARANSON anochi, den Compleho Deportivo Guillermo

P. Trinidad na Dakota, tabatin continuacion di Campeonato di
AVB ora cu e Pumanan di Piedra Plat, esta Sv Britannia Frisian
Flag a topa cu e Piratanan di Angochi, esta Ind. Caravel.
E aliñacion di Sv Britannia Pizza Hut tabata como lo siguiente;
Kendrick Dania, Theric Ruiz, Carl Geerman, Luis Murillo,
Pierre Estieverne, Carlos Caro, Johnatan Ruiz, Renier Paraez,
Margin Kock, John Lugay y Sebastian Montoya.

Riba banki tabata; Adrian Donayres, Danni Mozo, Cristian
Navarrio, JC Farro, Luis Estrada, Marvin Hous y Jasley
Boekhoudt. E wega ta cuminsa sumamente interesante ora
cu ambos team ta ataca otro en busca di e gol di bay ariba.
Ind. Caravel tabata bon para ariba tereno y no solamente tabata
defende, pero tambe tabata bay den atake continuamente.
Tabata na di 17 minuut di wega cu Sebastian Montoya ta habri
e score ora cu e ta manda su ekipo Sv Britannia Sports4all
riba 1-0 y asina tambe halftime ta bay aden cu score di 1-0 pa
Sv Britannia Vitamalt.Den di dos tempo, Ind. Caravel ta sali
mas dicidi y ta empata e wega na un gol pa banda pa medio di
Rioman Pallares na di 66 minuut. Mientras cu e wega tabata
desaroya poco poco Sv Britannia a cuminsa tuma rienda bek
di e wega cu algun atake bon cordina.

Ta na di 70 minuut cu Sebastian Montoya un biaha mas ta
anota pa su ekipo y ta haci e wega 2-1 na fabor di Sv Britannia
Frisian Flag y no a dura mucho na di 75 minuut cu Renier
Paraez, cu ta aumenta e score na 3-1 pa Sv Britannia Total
Finance y na di 82 minuut Sv Britannia ta haya un pinalti aki
ta Sebastian Montoya ta fusila e keeper Jeffrey Werleman pa
haci e wega 4-1.

Tabata na di 89 minuut cu Sv Britannia Bright Bakery un biaha
mas ta huña un pinalti, pero e biaha aki Jeffrey Werleman ta
bisa Sebastian Montoya cu ta un biaha bo ta capa e chubato
aki. Faltando algun seconde pa wega caba ta Jean Claude
Farro ta manda e ultimo clabo den e caha di Caravel p’asina
e wega bin caba cu score di 5-1 pa Sv Britannia Sports4all.
Cambionan cu tabatin ta; Jean Claude Farro a drenta pa Carlos
Caro, Marvic Hous pa John Lugay, Luis Estrada pa Renier
Paraez y Cristian Navarro pa Johnatan Ruiz.
Den e wega aki nos por a aprecia “the return of the dragon” ora
cu Marvin Hous ta bin bek riba tereno despues di un leccion
cu a mantene varios luna for di tereno di bala.
Cu e victoria aki Sv Britannia Pizza Hut ta acumula 40 punto
den 15 wega hunga y faltando 3 wega fuerte mas.
Di otro banda Ind. Caravel ta na di pinultimo lugar cu 10
punto den 15 wega hunga. E proximo wega di Ind. Caravel
ta contra di Riverplate y Sv Britannia mester enfrenta Bubali
diaranson 13 di april proximo.