Page 6 - AWEMAINTA

6 AWEMainta Diaranson, 13 Juni 2018

Studiante di polis cu e meta pa proteha nos medio ambiente

Diesdos ton di material saca durante accion

contra contaminacion di nos suela

DEN cuadro di un proyecto pa cu medio
ambiente un grupo di studiante di districto 4
Santa Cruz di Cuerpo Policial di Aruba a scoge
pa bin cu un accion pa cu e problematica di
contaminacion di nos suela (bodemvervuiling) a
causa di “metalnan pisa” (zwaremetalen).
E grupo di studiante aki di Cuerpo Policial di
Aruba kier conscientisa y alerta comunidad
henter riba e efectonan negativo cu metalnan
pisa tin pa cu nos medio ambiente, ecosystema
y salud.
Lamentablemente e grupo di studiante a
constata cu un tereno na Kibaima, cu ta cay
den e area berde di Land Aruba a wordo rosa
y uza pa deposita hero bieu manera entre otro
motornan bieu di auto cual ainda ta lek zeta y

asina contaminando nos suela y medio ambiente.
Di biaha e grupo di studiante aki a mobilisa y
tuma e pasonan necesario pa asina cuminsa cu
un accion pa recoge tur e hero bieunan aki y
ruim op e area berde menciona.
Mientrastanto den cooperacion cu e doño di
e heronan aki a cuminsa na kita mas o menos
un 12 ton di material for di e tereno. E grupo
di studiante di Cuerpo Policial di Aruba a pidi
cooperacion di DIP, Bureau City Inspector y di
Directie Milieu pa haci un inventario di e daño
haci y pa wak con lo por caba di ruim op y/of
sanea e tereno aki.
Cuerpo Policial Aruba ta haci un peticion na
comunidad pa tuma nan responsabilidad di yuda
cuida nos medio ambiente y pa no tira nada cu
ta contene metalnan pisa den mondi, damnan
tampoco laganan tira den cura.
Artefactonan cu ta contene metalnan pisa ta
entre otro baterianan (di auto), bleki verf y zeta
di motor di auto articulonan cu ta contene entre
otro koper, kwik, lood, cadnium y zink.
Na final di dia e accion aki a duna un resultado

positivo. E studiantenan a duna e doño di tereno
4 siman pa haci e tereno limpi y el a cumpli cun’e.
Hunto por sigui proteha y cuida nos naturalesa