Page 10 - HOH, 11 May 2015_

Hospital no a para pa cuido di pashent, esta cuido di 5 strea

Publication: Monday, 11 May 2015. Categoria: Judicial

Pashent di dr. Narain, ofelia Blijden

ORANJESTAD (AAN)Corte a ordena cu dokter Narain mester sigui atende pashentnan na
hospital te ora cu e negociacion final entre e specialist y e instituto concerni keda cla.

Diabierna mainta Corte den Prome Instancia den prome a scucha e pensamento di e partidonan
den caso cu dokter Narain a entabla contra Gobierno, pidiendo pa e sigui traha na hospital.

Manera ta conoci, dr. Horacio Oduber Hospital a dicidi di finalisa e contrato labora cu dr. Narain
debi cu el a cumpli 65 aña. Den e di dos tanda, segun e abogado di e specialist mr. Chris Lejuez,
nan a splica Huez pakico e ta kere cu nan ponencianan ta corecto.

Aunke cu Huez a bisa cu e lo anuncia su decision dia 27 di mei, el a tuma e orde maatregel cu
hospital mester laga Narain traha manera el a bin ta haciendo.

Den e contrato cu dr. Narain a firma ta bisa cu esaki ta caduca na momento cu e cumpli 65 aña,
pero despues a reserve su derechonan pa e sigui traha te cu su 70 aña. Esey a sosode na 1999.
Den e añanan cu a sigui, el a sigui traha normal y niun momento a avise cu hospital no ta di
acuerdo cu e condicion cu el a pone den e contrato pa e sigui traha te cu su 70 aña. Y awor cu el
a cumpli 65 aña nan a bise, segun mr. Lejuez, cu nunca nan a bay di acuerdo cu e condicion aki.
“Esaki no ta cuadra, pasobra no por t’asina cu 15 aña largo ta uza e contrato y di repente e no ta
wordo uza mas,” mr. Lejuez a duna di conoce.

Ofelia Blijden, ta un pashent did r. Narain, kende a bin ta luchando pa logra cu e specialista por
sigui labora na bienestar di su pashentnan. E tabata hopi contento cu den tratamento di e caso a
topa cu un Huez cu tabatin sentimentonan humano, cu a wak e interes di e pashentnan. E
Magistrado dado momento a pidi pa e dos partidonan sinta na mesa y trata di yega na un acuerdo
prome cu dia 27, ora cu e lo anuncia su decision. E Abogadonan a consulta cu Hospital, pero nan
a nenga un decision pafo di Corte. Sra. Blijden ta haya esaki lamentable ya cu hospital ta unico
caminda cu por bay pa busca salud, y a tuma un posicion asina fuerte, un guera cu dr. Narain
pero ta lubida cu e pashent ta central. Principalmente basa riba e situacion cu a surgi
recientemente cu ta busca Ginecologo na Aruba, pero no por a haya uno y ta un enfermero
mester a atende e pashent. “Mi ta hopi content cu nos a haya un Huez Humano y a wak e banda
di pashent y el a para pa e cuido di 5 strea y hospital no, cual ta lamentable.”

http://www.diario.aw/2015/05/hospital-no-a-para-pa-cuido-di-pashent-esta-cuido-di-5-strea/