Page 9 - HOH, 11 May 2015_

Dr. Narain no por compronde kico hospital tin contra dje

Publication: Monday, 11 May 2015. Categoria: General

Oranjestad (AAN) Na momento cu Corte ta tratando e caso di dr. Narain contra dr. Horacio
Oduber Hospital pa e sigui traha apesar cu el a cumpli 65 aña, edad di pensioen.

Ezzard Cilie, e director financier di dr. Horacio Oduber, a representa e instituto di Salud den
Corte. E problema, segun Cilie, ta cu hospital ta kere cu e no por traha sin permiso pero hospital
ta kere cu e mester di e permiso. Aworaki, basa riba e tussenvonis, ta bay permitie drenta
hospital pa e por mira su pashentnan tur dia.

Sinembargo el a mustra riba e hecho cu hospital tin reglanan cu mes como director financiero
mester mantene su mes na dje. Pa por traha den e hospital, e specialista mester tin permiso di e
team di maneho, cual no tabata e caso, pasobra el a cumpli 65 aña. El a recorda cu na December
ultimo a invita dr. Narain pa presenta pa un combersacion unda lo dicidi si berdad e tabatin
mester di e verlengin di e permiso pa traha na hospital. Pero e mes no a reacciona. El a enfatisa
cu nan ta respeta e decision temporal tuma door di Huez y lo ehecuta esaki, cual ta nifica cu e tin
permiso pa e drenta hospital pa mira e pashentnan.

Dr. Narain di su banda a bisa cu e situacion ta asina confuse y e no por caba di compronde kico
ta e problema cu no kier permitie pa sigui traha den hospital. Semper, el a bisa, gerencia tabata
pura pa sake for di hospital. “Ami nunca no por a compronde pakico. Mi ta spera cu e Huez
wordo ilumina y tuma un decision cu tan a su fabor.”
Tur e tempo cu Hospital no a permitie drenta, esaki tabatin e consecuencianan financiero p’e
pero tambe pashentnan a wordo perhudica, ya cu e interes di e pashent cu mester tabata na luga,
no a sosode. E ta haya hopi lamentable cu cosnan a bay asina aki. Desde cu e cos a sosode, e ta
den shock, principalmente e decision cu a wordo tuma contra di dje a bini for di un director
temporal. Aunke e ta contento cu e decision di Corte, e no por grita di alegria ainda, pasobra e ta
un decision temporal. Esun definitive ta bini dia 27 di mei awor.

http://www.diario.aw/2015/05/dr-narain-no-por-compronde-kico-hospital-tin-contra-dje/