Page 74 - KPA - JULI 6,2015

Polis cu pasa examen mester constata cu e candidatonan sa
staciona bon!

Publication: Monday, 6 July 2015. Categoria: Policial

Prome cu bin cu parkeer meters:

ORANJESTAD (AAN) — Prome cu bin cu e sistema di parkeer meters, e candidatonan cu ta
haci examen di rijbewijs mester sa con pa staciona bon. Un ex-polis cu a traha riba e tereno aki
pa hopi aña a comenta na Matutino DIARIO, cu e parti aki a wordo saca for di examen pa
rijbewijs siendo cu ta crucial pa tur hende cu ta core auto por staciona corectamente.

Tur caminda cu bo bay por mira cantidad di auto mal para, cu ta sali di e marco unda nan mester
staciona, y pesey tin biaha tin problema di rascamento di auto of dalmento mes, den diferente
caminda, entre otro den e parkeerplats di supermercadonan, djis pa nombra un ehemplo.

Esnan cu ta aplica pa rijbewijs no ta wordo getest durante e parti practico di examen, riba e
manera con nan ta staciona, y esaki ta hopi necesario ora nan bin cu parkeer meters, pasobra si
no hopi dalmente di auto tras di auto lo por sosode. Awendia no ta polis so ta duna les di
rijbewijs. Awendia si den famia tin un of dos hende cu ta core auto, ta nan ta sinja sea otro
miembro di e famia, un amigo, un bisiña y ta cobra nan tambe sin cu nan ta autoriza pa haci
esaki, despues nan ta busca un hende autoriza pa haya un of dos les y bay pasa examen.

Esaki ta un fenomeno cu ta crea hopi mal coredo di auto na Aruba, y tur dia por mira esaki riba
tur caminda na Aruba, na luz di dia, atardi, anochi, den madruga, y control practicamente no tin,
segun e ex-polis a subraya. Finalmente el a duna su opinion, cu tur hende cu ta pidi pa un
rijbewijs sea local of residente stranhero, mester wordo obliga pa ley, pa tuma henter e les di
mesa y riba caya cerca hende certifica pa dina rijbles. Ta e unico manera pa frena e cantidad
grandi di mal coredornan cu tin na Aruba actualmente.

http://www.diario.aw/2015/07/polis-cu-pasa-examen-mester-constata-cu-e-candidatonan-sa-staciona-
bon/