Page 11 - Awe Mainta
P. 11
AWEMainta Diamars, 27 Oktober 2015 11
MEP ta continua cu campaña di
Formulario di Belasting 2014
Paga
belasting si,
paga dimas
belasting no!
SIMAN pasa na Cede di MEP, a cuminsa cu e campaña
pa yena formulario di belasting.
Lider di MEP Evelyn Wever-Croes hunto cu un team di
profesionalnan rib’e tereno, a cuminsa diaranson caba,
y ta continua e siman aki.
“Paga belasting ta un deber di nos tur, pero no paga
dimas belasting. Pa evita paga dimas belasting,
bo mester yena bo formulario bon, y entrege na
tempo. Rib’e prome dianan nos a yena al rededor di
300 formulario. E interes tey especialmente den e
temponan dificil aki cu ningun hende kier paga dimas
belasting”.
E siman aki dialuna y diaranson di 6 or atardi pa 8 or di
anoch e equipo lo tey pa sigi brinda e ayudo. E ayudo
aki ta gratuitamente, manera Evelyn Wever-Croes a
bin ta organisa ya pa 5 aña consecutivo.
Dia 1 di oktober tur hende mester a ricibi nan
formulario di inkomstenbelasting pa 2014 y bo tin te
1 december 2014 pa entrege.
Documento di salario y pension
Ta importante pa bo trese tur bo formularionan, esta
comprobante di entrada y salario di bo doño di trabou,
cuanto placa bo a gana den 2014. Si bo ta pensionado,
bo mester haya un comprobante di SVB cuanto
pensioen di biehes bo a ricibi na 2014.
Interes riba debe
Tene cuenta tambe cu gastonan cu bo por deduci,
manera interes paga na banco den 2014 of na otro
institucion financiero, manera Island Finance, pero
tambe na mueblerianan of otro tiendanan cu bo ta
cumpra riba credit.
Yiu ta studia den exterior
Den caso cu bo tin yiu ta studia den exterior, bo
mester trese un comprobante cu e yiu ta inscribi na
un universidad den exterior na 2014, y e gastonan cu
abo mes a cubri pe.
Nos ta spera bo na Cede di MEP pa yudabo cu bo
formulario. Paga belasting ta deber di nos tur, pero no
paga dimas belasting si. Bin serca nos, pa nos yudabo
yena e formulario bon, pa bo por entreg’e na tempo.
