Page 7 - Awe Mainta

AWEMainta Diamars, 27 Oktober 2015 7

Partido MEP ta
sigui purba kibra
loke ta bon

Nan ta te hasta inventa cifra

PARLAMENTARIO di partido AVP, Melvin Tromp

por a tuma nota di un otro intento mas di partido
MEP pa purba susha e resultadonan positivo pa loke
ta nos turismo. Siman pasa Comision Fiho di Turismo
den Parlamento tabatin un reunion extenso cu ATA
y Minister Otmar Oduber unda a haya un splicacion
detaya di tur loke ta pasando den nos industria principal.
Den e reunion aki tambe tabata presente miembronan di
fraccion di MEP, kendenan a haya e mesun informacion
cu nos. Awor, mirando cu no tin ningun argumento pa
ataca, manera hinca man den saco y ata!
Turismo a bin na beurt pa wak ki daño politico por
haci na Minister Otmar Oduber. E t’asina ridiculo cu
ningun hende kier a pone nomber tras di e articulo y a
djis publike bou nomber di MEP, según Melvin Tromp.
Den nan afan pa haci daño, a publica un tabel unda
nan a pone cu e marketing budget di ATA ta di casi 80
miyon dolar, siendo cu e cifra aki no ta ni serca di e
realidad y esey tanto Dangui Oduber como Glenbert
Croes sa hopi bon, pasobra nan tabata den e reunion di
siman pasa y como miembronan di e comision nan ta
haya tur e informacionnan necesario. Cu e presupuesto
di mercadeo actualmente ta mas cu na 2008, esey ta
un realidad, pero e realidad tambe ta cu e forma di
mercadeo na mundo a cambia. Strategia di ATA ta pa
yega n’e bishitantenan afluente y pa logra esey tin entre
otro, formanan di mercadeo cu ta target e personanan
aki specificamente y e tipo di mercadeo aki tin su costo
cune.

Mas tristo ainda ta cu e persona frustra den MEP cu no
kier pone su nomber ta bisa cu no tin datonan di 2014,
cual tambe ta un mentira flagrante, pasobra tur dato ta
conoci y for di basta luna caba. Esaki ta un muestra di
con vies e hendenan aki ta y cu kier bay todo por todo,
inventando mentiranan pa kibra tur loke ta bayendo bon
na nos isla, según Melvin Tromp.Lo ta bon p’e persona
aki recorda con e situacion di cifranan di turismo tabata
ora cu nan tabata na mando te na 2009.
Hopi biaha tabata pasa lunanan largo sin un solo cifra.
Raportnan di Banco Central y CBS tabata wordo publica
sin e cifranan di turismo, nos pilar economico, pasobra
ATA no a entrega esakinan. Esey no t’e caso mas, tur luna
ATA ta publica e resultadonan di turismo, manteniendo
asina tur hende den comunidad al tanto di con turismo
ta bayendo y cual ta mustra cu aña tras di aña esaki a
bin ta mehorando. Un conseho p’esnan di MEP, enbes di
critica loke ta bayendo bon, dicon boso no ta contribui
positivamente pa mehora ainda mas, enbes di purba
kibra, Melvin Tromp a conclui.