Page 11 - aaa 29 june 2015

AWEMainta Diasabra, 27 Juni 2015 17

Minister Bermudez ta hopi satisfecho cu e ultimo desaroyonan

Cuerpo di Aduana a instala
‘management team’

DESPUES cu finalmente Cuerpo di Aduana a logra muda

pa un edificio temporal nobo, Cuerpo di Duana a ricibi
bishita di Minister Angel Bermudez n’e oficina central aki
situa awor na “Budlex Building” p’asina conoce e edificio,
comparti un rato cu demas colega y tambe conoce e ekipo
di maneho cu a wordo instala pa asisti Director di Aduana,
esta sr. mr. Roderick “Ricky” Croes den su maneho.

Segun Director Ricky Croes tur cambio ta tuma su tempo pa
adapta na dje sinembargo den e caso di Cuerpo di Aduana e
mudansa p’e edificio nobo a trece hopi union den e cuerpo
como tambe hopi motivacion pa cu e trabou.
“Tur colega ta entusiasma y nan a cuminsa mira e
desaroyonan cu ta tumando lugar pa mehora y motiva nos
den nos trabou”, asina sr. Ricky Croes a remarca.
Cu e mudansa aki tambe a instala un ekipo di maneho cu ta
duna sosten n’e Director y cu ta facilita e proceso di cambio
y actualisacionnan cu mester tuma lugar ainda den henter
e organisacion Duanero.
Na mes momento tambe e mandatario di finanza a comparti
tur e ultimo desaroyonan pa loke ta trata e departamento
riba su mes como tambe e plannan pa futuro.

Minister Angel Bermudez a manifesta su desapunte pa cu
e negligencia di e departamento aki den e ultimo añanan
principalmente tumando na cuenta e importancia di
Cuerpo di Aduana como un di e 2 cilindernan cu ta genera
entrada pa Gobierno.
Sinembargo e mandatario a segura cu Departamento
di Aduana tin su debido atencion y cu e iniciacion di e
‘management team’ lo facilita e mehoracion y progreso di e
trabounan diario como tambe a comunicacion necesario pa
realisa e actualisacion y modernisacion cu e departamento
tin mester.

“Recientemente e departamento a haya dos cacho nobo,
como tambe 5 auto pa diferente sector di e departamento
y siman pasa durante mi biahe pa Hulanda mi a apela na
mi ex-coleganan di Aduana pa nan sosten y ayudo cu algun
curso y training nos tin mester na Aruba, pues poco poco tur
cos a cuminsa cana y asina nos lo continua pa sigui mehora
e departamento aki”, asina e dignatario a splica durante e
reunion cu e ekipo di maneho.

Finalmente Minister Bermudez a desea tur miembro di
e ekipo di maneho tur clase di exito cu e tareanan y na
mes momento segura tambe cu e reunionnan semanal cu
Director Ricky Croes lo continua p’asina nan tambe trece
pa dilanti tur punto cu mester di su debido atencion.