Page 16 - flip min.sja

Minister Paul Croes na apertura di edificio FPNC: BALOR CU FPNC TIN TA
GRANDI

Cada biaha ora cu nos pone esfuerso y atencion na retonan cu ta pa mehora un comunidad, nos ta wordo
recompensa pe. Esey tambe a wordo refleha durante di diabierna atardi ora cu Fundacion pa nos
Comunidad a sobrepasa tur reto y awor depues di 5 aña a drenta den nan propio cas.
"Fundacion pa nos Comunidad ta apoya mas di 170 famianan mensualmente cu un pakete di cuminda.
Aunque pa hopi esaki kizas ta mustra un pakete chiquito, pa esnan den necesidad e ta un apoyo enorme.
Sector social tin e necesidad aki. Gobierno ta balora e trabounan di e Fundacion importante aki, pasobra
ta hunto cu nan, comunidad y boluntarionan nos ta bringa pobresa den nos sociedad. Mescos cu e
fundacion aki a opera bou di directornan anterior Claudine Wegdam y Indrah Stamper, Fundacion Pa Nos
Comunidad por sigui conta cu Gobierno su apoyo", Minister di Asuntonan Social a bisa. Un fundacion cu
a cuminsa cu e meta pa yuda nos hendenan menos afortuna cu cuminda y 5 aña despues ta sigui desaroya.
Alabes Minister Paul Croes a duna e grato noticia cu por medio di e projecto Feria Social, FPNC lo ricibi
15.000 florin adicional pa apoya nan den nan trabounan. Directora Suplente Francis Bulnes Quandt
hunto cu sra Nelkis Arends Operations Manager y e board di FPN y team di voluntarionan a sobrepasa e
retonan aki cu hopi trabao, esfuerzo y dedicacion. Diabierna atardi un voluntario di e fundacion Edinson
Asprilla hunto cu account manager di Banco Di Caribe sra Sue-Lan LioaJenden a corta e cinta den
presencia di president di board di FPNC sr Francis Saladin, secretaria di Board sra Andreina Nicolaas,
Finansas di board Javier Rasmijn y Minister Paul Croes. Den e edificio nobo lo tin un tienda cu ta bende
articulonan y productonan pa asina por genera entrada pa asina bai bek na projectonan di e fundacion.
Minister Paul Croes a felicita e fundacion cu ta resorta bao di su Ministerio cu nan edificio nobo y a bisa
cu e ta contento di e perserverancia cu nan a pone pa e continuidad di e fundacion.

http://www.24ora.com/politica-mainmenu-18/92386-minister-paul-croes-na-apertura-di-edificio-fpnc-
balor-cu-fpnc-tin-ta-grandi