Page 89 - MIN TTC OCT 2, 2015

Parkeermeters a bin sin cu comercio a haya suficiente informacion rond di
esaki
Publication: Friday, 2 October 2015. Categoria: General
Segun presidente di KVK,
tin comerciantenan cu awor tin algun dia di venta di cero florin

ORANJESTAD(AAN): Diahuebs durante un conferencia di prensa na Camara di
Comercio(KVK), prensa a puntra presidente di KVK Daphne Lejuez tocante e desaroyonan rond
di entre otro e hecho cu a bin cu e ‘parkeermeters’ na playa, unda cu tin varios comerciante cu lo
ta sinti efectonan negativo di esaki.
Segun Lejuez, un di e problemanan ta cu KVK y e comerciantenan no a wordo involucra den e
proceso di implementacion di e proyecto y ni nan ni KVK a haya informacion tocante esaki.
“Mas tanto tabata un sorpresa di e manera con el a wordo ehecuta”, segun Presidente di KVK.
El a sigui bisa cu algun aña pasa si KVK a haya informacion cu lo bay bin tram, garage di
parkeer, parkeermeters etc, pero den e ehecucion di esaki ora cu e tabata cla pa wordo ehecuta,
KVK no a wordo involucra.
No tabata tin discusion ni cu comercio ni cu KVK, segun Lejuez.
“Nan a yega cu 1.400 lugar di parkeer pa cual bo tin cu paga, pero niun hende no tabata sa con
esaki lo bay wordo hasi, of cuanto e ta bay costa”, segun Lejuez.
El a sigui bisa cu banda di e hecho cu e comerciantenan ta sinti e efecto di e parkeermeters, nan a
menciona tambe cu e tram a causa problema pa nan y pesey KVK a bin dilanti pa comparti e
preocupacionnan di e comerciantenan den playa.
A puntra Lejuez si e comerciantenan ta contra e parkeermeters y el a bisa cu nan no ta contra.
Hecho ta cu nan ta haya cu e manera con e proyecto a wordo ehecuta, a laga un tiki di desea.