Page 90 - MIN TTC OCT 2, 2015

Segun Lejuez, KVK ta bay sinta cu Arubus y Aruparking, pa purba yega na un convenio.

E intencion ta pa wak kico por hasi pa mehora e situacion, mirando tambe cu tin propietarionan
di negoshi cu a indica cu tin dianan riba cual nan a gana zero florin, desde cu a bin cu e
parkeermeters.

DIARIO a puntra presidente di KVK si e comerciantenan a bin cu algun sugerencia relaciona cu
e parkeermeters.

Lejuez a splica cu e comerciantenan ta haya cu quizas por a cuminza na pone parkeermeters
directamente den caya y un tiki cerca rond di caya, pero no expande esaki asina leu.

Esey lo a pone cu hende por a dicidi di para nan auto un tiki pafo di caya grandi sin paga y cana
bin den caya pa hasi compras, si nan no tabata desea di paga pa parkeer.

“Aworaki a amplia esaki asina tanto cu te DA y Kong Hing bo ta haya parkeermeters”, segun
Lejuez.

Tin un tiki confusion entre e ‘parkeervak’ geel y esun blanco y varios pregunta, pues tin hopi cos
cu por a wordo hasi mihor, entre otro un campaña mas amplio di informacion rond di e proyecto,
segun Lejuez.

Un di e problemanan grandi pa e comerciantenan ta tambe cu e proyecto di parkeermeters a bin
den e temporada di aña cu ya caba venta normalmente ta abao.

Awor a bin cu e parkeermeters y esaki ta causa ainda mas problema di venta, mirando cu ta low
season.

Net ora cu e comerciantenan tabata recuperando di e hecho cu pa algun aña caya grandi tabata
den construccion y hopi hende a cuminza bay hasi compras otro caminda, awor a bin cu
parkeermeters, net den September.

Pesey e intencion ta pa KVK sinta na mesa cu Arubus, Aruparking y tur esnan envolvi, pa wak si
por yega na algo cu lo ta mas positivo pa e comerciantenan.

http://www.diario.aw/2015/10/parkeermeters-a-bin-sin-cu-comercio-a-haya-suficiente-informacion-
rond-di-esaki/