Page 9 - KPA 24 MAART 2016

Inspector Andrew Hoo Tin menos hende ta
campando e aña aki

Wednesday, 23 March 2016 20:28
Comparti

Andrew Hoo ta inspector di polis y a conta nos un tiki riba e temporada di campamento. Campamento
di e aña aki a cuminsa diamars, dia 22 di Maart y lo finalisa aki dos siman. A haya un total te cu ayera,
96 peticion pa vergunning.

E por bira un tiki menos door cu tin hende ta cancela tambe y awor aki caba no lo bay bin mas acerca
debi cu ta laat caba. Loke tin awor caba ta basta stabiel. Si compar’e cu aña pasa, el a baha cu 11. Aña
pasa tabata tin 107 vergunning pidi y tambe e hendenan cu ta participa na e campamento, a baha cu
464 persona. Aña pasa tabata tin 2354 persona cu a campa na nos beachnan den area di Noord, for di
Arashi te cu Eagle Beach net tiki panort di Costa Linda, cu ta e area di campamento. Mayoria ta
concentra na Eagle Beach si, segun Hoo y e otro partinan, Arashi, Baranca Plat y Malmok, Fisherman’s
Hut, tambe tin basta hende, pero e concentracion ta na Eagle Beach. Tentnan a keda casi mesun cos,
trailer tambe. Tambe tin hende ta bin cu WC y douche y nan delco. Tur esey ta hinca den otro. E fin di
siman aki ta verscherp e dienstnan. A aument e cantidad di polis riba caya bastante. Cifra precies no ta
conoci pasobra ainda esey ta den plan. Lo bay tin sigur e biketeam. Ta bay tin polis riba quadracer
patruyando rond di e area y patruya normal cu ta tuma e asistencianan den e areanan di beach. Shaba
su personal, cual tambe ta cay bao di e rayon di Strandpolitie, lo yuda tambe. Esey lo ta un help grandi.
E preocupacion principal ta e tenemento limpi di e area. Hopi biaha ta ripara cu ta un problema.
Mayoria hende sa comporta nan mes, pero loke a ripara ultimo paar di aña ta e sushedad cu ta keda
atras y tambe durante campamento. Nan no ta haci uzo di e bari di sushinan of nan reglamento di
limpiesa ta laga hopi di desea. Nan ta BBQ riba beach, cual polis ta controla hopi riba dje. Tambe tin
hende ta molestia e neishi di turtuga. Ta suplica publico pa no molestia e neishinan. Tin cu tene cuenta
cu bo bisiña riba beach. Logico cu bo ta bay toca muziek, pasa bon, pero tin cu tene cuenta cu molester.
Tambe cu loke polis ta maak mee, ta bishitantenan cu ta bin pa algun ora, y nan ta bin cu nan auto,
habri bahul, icejug ta habri, drinks ta skeiro y muziek ta cuminsa bati duro. Esey ta un problema cu a
ripara. Hopi biaha ta hendenan cu no ta campando. Nan ta bin djis pa e trip. E ta causa stagnacion den
trafico y e ta causa un molester, segun Hoo. Lo bay tin man firme riba esaki y si wak bebidanan den
publico, cual no mag, ta actua contra esaki, Hoo a splica.