Page 15 - BNDIA ARUBA

A15
HENDE Dialuna 19 Juni 2017
Rapper La Jefa:

“Na Aruba rap femenino no ta haya mucho atencion, pero e nivel ta halto”

ORANJESTAD - Johanny Grullon miho conoci bou di
su nomber artistico “La Jefa” ta un hoben Dominicano
cria na Aruba. E hoben cu semper a skirbi su mesun
letranan y ta practica e arte di rap ta comparti su storia
cu Bon Dia Aruba den e edicion aki.
Grullon tin 18 aña actualmente y ta un studiante. Aunke e
hoben a cuminsa canta desde tempo e tin cuatro aña, prome
biaha cu el a drenta un studio pa graba e tabata tin 11. ‘Desde
tempo mi ta chikito tur hende ta bisa mi cu mi lo ta un artista.
Mi tabata gusta canta, no tin un programa di muziek infantil
cu mi no tabata wak. Ora mi tabata bay fiesta nan tabata pidi
mi pa canta tambe. Semper mi a canta mi mesun letranan y
riba mi mesun flow. Tempo mi tabata tin 14 aña ami cu mi
amiganan a forma e grupo “Hood divas Aruba”. Nos a te hasta
logra zona na Curaçao den e top 10, cu e cantica “Netjes den
caya”. E no a zona pa largo pero e tabata un dushi experiencia.
Despues mi a sigui cu diferente gruponan y aunke niun a yega
mucho leu toch mi no a stop. Di eynan e nomber “La Jefa” a
bin.”

Rap femenino na Aruba

E hoben ta conta cu e ta mira e nivel di hende muhe cu ta rap
na Aruba ta halto,
mas sinembargo nan no ta wordo duna mucho oportunidad
pa crece como artista.
E hoben ta bisa “Mi tin hopi hende ta back me up y esey ta
motiva mi pa sigui.
Tambe mi por domina tur cuatro idioma, cual ta haci cu mi
por explora nan tur den mi arte.
Mi a graba algun cantica mi so y ricibi hopi bon feedback di
tanto artista local como internacional. Mi a conoce e artista
Ritmo Real y mi tabata pertenece cu ne na e grupo di Ego
Gang.” . Nan cantica “nada no a cambia” cual a wordo lansa
algun luna atras tin mas cu 110 mil views riba Youtube. E ho-
ben a subi escenario cu e grupo na diferente ocasion tanto na
Aruba como na Curaçao.

Futuro

E hoben ta finalisa bisando cu su deseo mas grandi ta keda pa
wordo reconoci como un artista. Sea na riba un nivel local of
internacional. E ta subraya cu rap ta un bon heramienta pa
mobilisa sociedad, basta e wordo uza den un forma positivo.
“Desafio tin tur dia, pero e amor pa e arte ta keda crece cu
cada desafio cu bin.
Mi a yega na e momento cu mi a realisa “I can do it”. Mi ta
conta cu sosten di mi famia, mi amigonan y fansnan cu ta
keda bin acerca cada biaha mi rap”. E hoben ta comenta.