Page 25 - Extra 5 dec,2015

26 Djasabra 5 Desèmber 2015

Sòru pa sangura
no pikabo

Tene sangura pafó di kas dor di pone hor (sefta) na bentana i porta. Esaki ta
un invershon (grandi), pero ta un di e maneranan mas sigur di tene e sangura
leu for di bo sernan kerí.

E sangura Aedes aegypti ta mas agresivo mainta ora solo ta saliendo i
atardi ora solo ta baha. Pero unabes e ta den bo kas e ta keda aktivo henter
dia i anochi ku su pikamentu! Pa tene e sangura pafó di kas por tene bentana
ku porta será te ora e periodo di aktividat haltu pasa.

Ta importante pa sigui tur e rekomendashonnan aki pero mas importante
ta pa eliminá tur kriadero di sangura den i rondó di nos kas.

Abate®

Abate® ta un produkto pa pone den awa i ta usa esaki pa mata e bichi di
sangura den awa, den por ehèmpel un barí. Abate® ta un larvisida, e ta mata
e larva di sangura den awa promé ku e kambia bira sangura. Mester sigui e
instrukshonnan kon ta us’é. Mal uso òf uso inadekuá di Abate® por stimulá
resistensia serka e sangura. Esaki por tin komo resultado ku den futuro Abate®
lo no ta efektivo mas pa mata bichi di sangura.

Por buska Abate® na ofisina di Salubridat Públiko di djaluna pa djabièrnè
parti mainta entre 8’or i 12’or na Zakitó (Piscaderaweg 49).

Por konsultá profeshonalnan na Zakitó pa tratamentu pa baki di awa grandi
ku no ta tapá pa eliminá sangura di un forma efektivo.

Usa insektisida di un manera responsabel i efektivo

Por usa insektisida (flit) pa yuda eliminá sangura ku ta den kas kaba. E
manera responsabel di usa insektisida ta pa sòru:

Pa no tin hende ni bestia di kas den e kamber ora ta bai flit.
Sera porta i bentana promé ku flit.
Kòrda flit lugánan skur i ketu manera bou di kama, riba kashi, i hukinan.
Laga e kamber será pa 30 minüt. Despues laga airu pasa promé ku bolbe
usa e espasio.

Rèket Eléktriko

Tin un tipo di rèket ku ta pasa koriente leve pa mata sangura ora nan yega
serka. Ku e rèket eléktriko ta bira mas fásil tambe pa yag e sangura i mat’é
kaminda e ta gusta skonde manera p.e. bou di tur sorto di muebel i artefakto,
den huki ketu i skur, den plafònt, riba kashi. Esaki ta un manera sin usa
insektisida di deshasí di sangura ku ta den bo kas kaba.

Kiko mester hasi ora GMN ta pasa flit

Hopi hende ta wak sangura komo djis un molèster, pero realidat ta ku
sangura ta peligroso pasó e ta responsabel pa un lista largu di infekshon. E
infekshonnan por varia fo’i algu paresido na grip te ku kondishonnan di salú
ku por dura bida largu òf asta kousa morto.

Eksperensha den siglo 20 a siña nos ku nos no por kombatí sangura
simplemente ku flitmentu.

Uso pa loko di insektisida a krea na promé lugá resistensia serka sangura.
Den otro palabra ménos i ménos sangura ta muri ora pasa flit awendia. Ademas
flitmentu ta mata solamente e sangura adulto, si den un kaya den kual a pasa
flit tin vários kas ku lugá kaminda e sangura a pone webu, djis despues ta
haña un kantidat di sangura nobo ku a brui for di e webunan aki.

Na di dos lugá uso di insektisida rònt den naturalesa no ta mata sangura
so, pero ta eliminá insektonan hopi mas frágil i nesesario den nos ekosistema
tambe manera abeha, barbulètè, yeye, bakatòr i mas.

Pa e motibunan aki prevenshon ta keda e arma di mas importante ku nos
tin kontra di sangura. Nos Ministerio di GMN ta rekurí na flitmentu masal
solamente na momentunan di emergensia i ora ku a evaluá ku e bentahanan di
flit masal ta surpasá e desbentahanan. Por fabor tuma e siguiente medidanan
di prekoushon:

Tapa tur kos di uso den kas p.e. tayó, kòpi, wea.
Tapa kuminda i kos di kome.
Tapa baki di awa i kuminda di tur bestia di kas i/òf laba esakinan bon
despues ku e trùknan a pasa flit.
Protehá bestia di kas, spesialmente piská i turtuga pasó nan ta sensitivo
pa e ingrediente aktivo den e flit unabes esaki drenta den kontakto ku awa.
Tene tur porta i bentana habrí ora ta pasa flit pa e produkto penetrá den
tur espasio.
Despues di un (1) ora por sera porta i bentananan bèk.