Page 9 - HOSPITAAL

Diahuebs, 14 Juni 2018 AWEMainta 7

Prome Minister Evelyn Wever-Croes:

Reforma di impuesto lo nivela e peso di impuesto den comunidad

Cu e Reforma di Impuesto e ‘Crisisheffing’ ta pasa pa pasado

DESPUES cu Gobierno di Aruba a anuncia
‘Crisisheffing’ temporal, mesora a cuminsa cu e
trabounan pa yega na e Reforma di Impuesto.
E reforma di nos sistema di impuesto ta bay
inclui un cambio di e sistema di impuesto y haci
e sistema na un forma mas husto. Impuestonan
directo lo wordo baha y e cobramento di
impuesto lo bay na un forma mas indirecto.

Prome Minister a indica cu Gobierno a cuminsa
cu e trabounan pa scoge e forma di impuesto cu
lo bay introduci. Ya a cuminsa cu inventarisacion
di tur locual cu a wordo haci riba e tereno aki

caba. E siguiente paso ta pa reuni cu esnan
concerni pa hunto yega na e miho manera pa
yega n’e Reforma di Impuesto. Cu esaki, Prome
Minister ta enfatisa cu lo pone un punto final di
biaha na e ‘Crisisheffing’.

Kico ta Reforma di Impuesto? Reforma di
Impuesto ta pa nivela y comparti e peso di
impuesto den nos comunidad. Den e Reforma
di Impuesto lo tuma nota di e impuestonan cu
actualmente tin un peso hopi halto, entre otro e
loonbelasting. E intencion ta pa rebaha esaki sin
descarta cu den futuro te hasta por yega na elima
e impuesto aki. Cu e Reforma di Impuesto lo

nivela e peso di belasting. Actualmente, e peso di
impuesto aki ta hopi halto riba cierto gruponan
den nos comunidad manera pensionadonan y
esnan cu ta traha den sector hotelero of esnan cu
ta traha hopi ora extra. Esaki lo conoce cambio
den e Reforma di Impuesto.

Otro ehempel di un Reforma di Impuesto cu ta
nivela y comparti e peso di impuesto miho ta
riba ‘Grondbelasting’. Impuesto cu ta paga riba
propiedad. Na Aruba tin hopi condominio cu ta
wordo uza como un di dos cas. Por hustifica cu ta
baha grondbelasting riba uzo di vivienda personal
y subi grondbelasting riba condominionan cu ta
wordo uza como un di dos cas.

“Esakinan ta algun ehempel di mucho mas
cu Gobierno ta studiando pa calcula kico e

efectonan ta pa mira kico por wordo introduci
di inmediato, kico por wordo introduci durante
e siguiente aña. Y pa mas tarda, final di 2019 ful
e Reforma di Impuesto ta cla y e “Crisisheffing“
ta pasa pa pasado,“ Prome Minister Evelyn
Wever-Croes a duna di conoce.