Page 10 - flip min.sja

Proyecto “Poder di Hubentud ” ta keda lansa

• Jan 15th, 2015
• Local

Den un conferencia ATHA a anuncia un proyecto poder pa hubentud. Ricky Hoek director di ATHA
durante e conferencia a splica un tiki riba e intencion cu e proyecto. Tambe el a conta kendenan tur ta
envolvi.
ATHA hunto cu e comision ta di opinion cu mester pone hobennan cu ta activo den nos comunidad den
un luz positivo y duna reconocemento pa e bon trabounan cu nan ta haci.
E comision cu a traha riba e proyecto aki ta consisti di: Nurienne Helder, Yvonne Veeris, Nichelline
Molina-Granville, John Freddy Montoya, Elsa Krozendijk y Anuar Habibe.
Pa basta tempo e grupo di persona aki a traha riba e proyecto y awor ta asina leu pa e keda lansa pa e
hubentud di Aruba.
E vision di e proyecto aki ta pa stimula e hobennan pa logra metanan concreto y duradero.
E mision di e proyecto ta pa stimula y apoya hobennan pa logra lidernan ehemplar.
Ricky Hoek a splica cu obhetivo di e proyecto aki ta pa mustra e hoben e importancia di kere den nan
mes. Mester crea e balor den hubentud y bira un role model.
E grupo meta ta wordo reparti den dos grupo cu ta core di 12 pa 24 aña.
Pa un hoben por participa na e proyecto aki e mester ta residente di Aruba bibando por lo menos 3 aña y
ta un persona legal.
Lo tin 7 categoria cu e proyecto lo enfoca riba dje:
1. Social
2. Arte y Cultura
3. Educacion
4. Deporte
5. Trabou Boluntario
6. Inovacion
7. Communicacion
E exigencianan pa participacion mester ta cu e hoben a destaca door di haci trabounan boluntario
cuminsando for di 1 januari 2014 te cu 1 januari 2015. Un hoben cu ya den pasado a yega di ricibi
reconocemento tambe por participa den e proyecto aki,.
E proyecto aki conoce algun fase. Tin e fase di aplicacion. Ricky Hoek director di ATHA a splica con e
aplicacion lo bay. Via scol y Fundacionnan of ATHA ta haya formulario. E formulario por wordo yena via
website www.athaaruba.org cu lo yega na email di ATHA.
Na tur scol lo reparti cu formulario tambe y tur mucha cu ta interesa por aplica di e forma aki tambe.
No ta solamente e hoben mes por aplica pero tambe su mayornan, organisacion of instancia cu e ta
pertenece na dje etc.
Tur formulario na final mester keda entrega na oficina di ATHA of e formulario digital lo bay via e email di
ATHA.
Despues e comision lo haci un seleccion di tur formularionan ricibi a base di tur criterio.