Page 22 - EXTRA28NOV2015
P. 22
22 Djasabra 28 Novèmber 2015
SALUDABEL TAMBE POR TA DUSHI
WILLEMSTAD- Desèmber ta e luna ku mas nos ta kome i bebe. Tur
kaminda tin fiesta I selebrashon, i kuminda hopi bia ta e atrakshon
prinsipal. P’esei nos a skohe pa trese informashon di un evento ku ta
habri luna di desèmber ku opshonnan mas saludabel.
Mayoria hende ku tende kuminda saludabel ta pensa mesora riba tur e
kosnan ku bo no tin mag di kome òf ku no ta dushi. Pero e pensamentu aki
mas i mas ta kambiando. Hendenan ta birando mas konsiente i ta skohe
pa eduká nan mes i invertí den opshonnan ku tin benefisio pa nan salú,
pero na mes momento por brinda tambe plaser den loke nan ta kome. No
tur ora ta un desishon simplemente pa mehorá kalidat di bida, pero den
hopi kaso ta un reakshon riba un salú ku a ser afektá dor di mal nutrishon
kaba. Pa komé realmente saludabel, esta kuminda no prosesá ku ta bini for
di naturalesa na lugá di kosnan prosesá ku kímiko produsí den fabriká, ta
birando kada dia mas pagabel, alkansabel i popular aki na Kòrsou tambe.
Mas hende a kuminsá planta, tin mas tienda di salú, diferente revista i
programa di salú, i produktonan den supermerkado ku ta sea orgániko
o ta mihó pa nos salú. Interes di pueblo pues ta kresiendo, poniendo ku
e variedat disponibel tambe ta krese. Esaki ta un tendensia globalmente
ku aki na Kòrsou tambe ta kohiendo forsa. Pero lástimamente ainda hopi
opshon ku tin riba merkado no ta konosí pa hopi hende. Mayoria bia ta un
boka ta bisa otro.
Netamente esaki ta loke Oasean ke trese kambio ne. Den e di tres edishon
di Oasean Wellness Farm, ku ta un serie di evento ku ta toka kada bes un
otro tema di bienestar, lo pone énfasis riba nutrishon saludabel. E edishon
akinan a yama “Healthylicious” pa ilustrá ku saludabel tambe por ta dushi.
E promé edishon di Oasean Wellness Farm ku a tuma lugá 4 di yüli último
tabata di focus riba yoga. E di dos edishon dia 5 di òktober a pone énfasis
riba e kurpa físiko ofresiendo diferente workshop di moveshon manera
Body Balance, Pilates, Yoga iCrossFit Mobility. Ambos edishon a tuma
lugá na “The Eatery” na Hofi Cas Cora.
