Page 12 - SAFFER 07
P. 12
VUURPYLE OP
DIE STRAND
Wat die laat herfs en vroeë winter aan die Suidkus van Kwazulu-Natal so aantreklik maak vir
vakansiegangers, is nie net die heerlike warm weer (in vergelyking met die res van die land) nie. Dit
is asof die omgewing self vasberade is om die beste voetjie voor te sit: die son skyn ‘n warmer geel
wat weerkaats op die goudkleurige sand, die lug en die see is blouer as gewoonlik, en die plantegroei
wys hulle mooiste kleure. En dan is daar natuurlik die sardyne, die elwe en die roofvisse wat hulle
verskynmaak – maar dis ‘n storie vir ‘n ander dag.
Oranje is vir my die mooiste winterskleur en net daar waar die helder-oranje koraalbome, strelitzias,
clivias, kannas en alwyne hulle blomme uitstoot, moet ons altyd stilhou om ‘n paar foto’s te neem.
Baie van hierdie plante groei op die sypaadjies of langs die kusweë, sommiges selfs in die brandpaaie
tussen die suikerriet. Die alwyne (of vuurpyle, soos ons hulle noem) floreer tussen die duine en
rotsagtige grond reg langs die strand. Die meeste van hierdie foto’s is geneem op die strande naby ons
woonplek wat ons gereeld besoek: Southport, Sea Park, Umtentweni en Uvongo. Hulle groei egter
volop langs die hele strandgebied vanaf Hibberdene tot in Port Edward.
Die vuurpyle se blomtydperk kan in goeie jare duur van laat Mei tot einde Julie, mits die
weersomstandighede gusnstig is. Hulle verwelk egter vinnig wanneer die yswinde van die
toegesneeude bergreekse af waai of as hulle verniel word deur stortreëns, wat wel soms in Julie
voorkom, hoewel hierdie eintlik ‘n somerreënvalgebied is.
Veral nou in die grendeltydperk, is hierdie blomme ‘n prag waaraan ons onsself verwonder op ons
daaglikse uitstappies strand toe.
Follow Hester at https://www.hesterleynel.co.za/
| 12