Page 32 - AVP

Hulanda Ta Rabia, Iritia Cu Prome Minister Y Aruba

“Gobierno Ta Bisa Un Cos Pero No Ta Cumpli”

 Politica
- 20/06/2019

Na momento cu Parlamento di Aruba a minimalisa e rol di College Financieel Toezicht y
Conseho di Minister di Reino, Aruba ta trece hopi problema pa su mes. Esaki ta
pensamento di politica na Hulanda y sigur di Andre Bosman, kende ta wordo considera
un bon amigo di Evelyn Wever Croes y su Gobierno.
E tema aki ta algo cu a wordo trata den un reunion di Tweede Kamer diahuebs mainta,
durante un reunion di e Comision di Relacionnan di Reino.

Den e reunion aki tambe tabata presente Secretario di Estado pa Relacionnan di Reino
Raymond Knops.

Raymond Knops a expresa cu e decision di Parlamento pa schaakmat CAFT, cu ta tene e
vigilancia financiero di Aruba den forma independiente, lo tin su consecuencianan pa
Aruba riba e mercado internacional di capital, ora cu e bay haci prestamo y cerca e
instancianan internacional cu ta percura pa evaluacion di Aruba, manera Fitch Ratings y
Standard & Poors.
E ley di LAFT aki cu a wordo pasa cu 6 luna di retraso, segun publicacion na Hulanda, ta
diferencia riba 40 punto di loke ta para den e Protocol cu Prome Minister Evelyn Wever
Croes a firma cu Gobierno di Hulanda.