Page 18 - WEB
P. 18
ORANJESTAD (AAN) –Informacionnan cu DIARIO a presenta na Aruba, ta wordo
confirma dor di anuncionan cu ta wordo haci dor di e oficina central di Citgo na Merca.
Den un relato pa prensa di Citgo Petroleum Company, e gerencia cu Presidente Interino
Guaidó a instala a anuncia cu e ta busca refinanciamento nobo pa debenan di e
compania.
E siman aki, DIARIO a mustra e problema serio cu Citgo ta pasa aden a base di e
debenan cu e tin cu Rusia y cu financiadonan Mericano cu tin accionnan di e compania
den nan man.
E seriedad di e situacion a bira visibel Dialuna y manera DIARIO a splica siman pasa, e
financiadonan ta den situacion sumamente dificil pasobra e balor di Citgo ta baha den e
desaroyonan nobo y nan mester tene cuenta cu e medidanan di Merca.
Manera lectornan di DIARIO a wordo informa corectamente, Rusia tambe ta pendiente
kico lo bay pasa ya cu Merca a tuma medidanan pa proteha su mes contra e hecho cu
Rosneft tin un parti importante di Citgo den su man.
Un comunicado di prensa cu DIARIO tin di e servicio noticiero di Citgo ta indica e
compania ta busca refinanciamento di e prestamo di 1.370 Biyon cu e mester paga na
2024 y otro prestamo di 500 Miyon.
Si Citgo logra haya e financiamento cu e tin na bista e kier paga e suma di $1.870
Biyon Dollar di e placa cu Nicolas Maduro a haya na 2016 y a uza pa su proyectonan na
Venezuela pero cu Citgo como borg. E suma di mas cu 1.8 Biyon ta representa e suma
cu Nicolas Maduro a ricibi cu un interes di 10.75 porciento na 2016 ora tambe el a
entrega e resto di accionnan di Citgo como borg na e compania di estado Ruso, Rosneft,
pa placa cu el a haya di Rusia.
En espera di e resultadonan di su intentonan pa refinanciamento cu mester tene cuenta
cu tur medidanan cu tin actualmente na Merca, Citgo ainda no ta tuma ningun paso
legal concreto cu por mara e compania enfrente e companianan cu tin 50.1 porciento
pues mayoria di e accionnan di Citgo como borg.
E decision di Citgo ta bini na momento cu Merca ta insisti cerca Maduro pa pone e
ehecutivonan Mericano cu ta den prizon na Venezuela den libertad.
