Page 21 - WEB

Den e sistema di reciclahe, ta separa e diferente tipo di materialnan di e monton di
desperdicio (papel/carton, metal, aluminium, sushi chikito (resto) y RDF (Refuse-Derived
Fuel).

RDF t’e combustibel produci for di diferente tipo di desperdicio manera sushi di
MSW, residencial y comercial.

Den e ambiente aki e expertonan a haci un evaluacion di e actual metodo den
comparacion cu e opcion pa kima tur sushi no-sortia. Den e sistema di traha di awor, ta
hinca RDF den bales y ta dera nan na Ser’i Tijshi. Tin metodonan adicional cu por uza e
RDF, por ehempel como combustibel of como material di construccion.

Den e estudio haci dor di ARCADIS ta nota cu e sistema actual di separacion di
desperdicio y e forma di traha di reciclahe, ta loke nan ta considera “state-of-the-art”,
segun normanan Europeo. Por lesa tambe den e raport cu si e maneho di Aruba ta pa yega
na un economia circular, esta reciclahe, e ora esey mester t’e punto di salida.

Mas ainda pa motibo cu re-uzo y spaarmento di materia prima ta un parti escencial di
durabilidad (maneho sostenibel).

Kimamento di sushi (incineracion), den comparacion cu reciclahe, tin un impacto social
negativo pa medio ambiente. Di otro banda, reciclahe ta produci cupo di trabou, contrario
na kimamento di sushi.

E instalacionnan di Waste to Energy (WTE) ta trece cun’e inversionnan financiero grandi
como tambe gastonan operacional halto. Ta cobra un “tipping fee”, esta loke ta
paga extra pa haci uzo di e instalacionnan, cu lo ta mucho mas halto y cu un
peso financiero halto pa comunidad.
Cu e sistema aki mester tene cuenta cu emisionnan y control di e emisionnan cu ta bay
den e aire, como tambe creacion di un dump p’e sas (resto di e sushinan kima) cu ta keda
atras.

Mester ta cla cu ora ta kima sushi, un porcentahe grandi ta bay den aire como sas y huma
y otro parti ta keda abou, cu tog mester un dump pa der’e.