Page 18 - ATA

Pa loke ta trata e reunion di Latino America (cu a tuma luga prome di augustus), a enfoca
riba diferente punto cu lo continua den 2020, pero tambe – manera semper – algun
cambio grandi cu A.T.A. lo efectua den e aña binidero. Aki a tuma e oportunidad tambe
pa tuma cierto decision hunto cu esnan presente, basando e cambionan riba input di e
socionan clave. Entre otro a papia riba ANATO 2020 y CATA 2020.

Den e contexto aki ta gradici AHATA tambe kende, manera a bira custumber, ta compila
feedback y ta entrega na A.T.A. e pensamentonan pa cu cada region, ya asina A.T.A. por
tuma esaki na cuenta tambe durante e proceso, locual a sosode.

Den 2018 e continente Sur Americano a representa 18.9% di e cantidad total di e
bishitantenan pa Aruba. E mercado Venezolano a / ta sigui confronta e retonan grandi.
Aña pasa nos isla a ricibi un total di 164.085 turista Latino Americano. Por a nota cu -si
exclui Venezuela- e continente Latino America a cera cu un crecemento di e turistanan
‘stay over’ pa Aruba di 7%, un total di 113.503 bishitante. Strategia lo sigui enfoca riba e
ultimo mercadonan aki, esta Argentina, Brazil, Chile y Colombia primordialmente, pa
asina sigura cu e region (fuera di Venezuela) sigui den crecemento. Esaki ta un parti
cardinal di e strategia di Aruba pa diversifica su mercadonan. Tambe lo sigui traha riba
Peru, un mercado cu a bin ta mustra crecemento y un pais cu ta importante, mirando e
esfuersonan continuo pa logra un buelo non-stop for di Lima, haciendo di esaki e ora e di
tres hub clave den Sur America pa Aruba, banda di Bogota y Panama. Mas cu claro tin
diferente otro esfuerso riba area di aviacion, cu ta ricibi atencion di A.T.A. hunto cu
Aruba Airport Authority.

Conforme planificacion, A.T.A. ta entregando su Plan y Presupuesto pa 2020 na Hunta di
Supervision di A.T.A. dia 30 di augustus. Esaki ta revisa debidamente door di e
miembronan. Consecuentemente lo entrega e Plan y Presupuesto 2020 na Minister di
Turismo den september 2019. Diferente reunion lo sigui, pa asina completa otro ciclo di
produccion di plan y presupuesto.