Page 53 - MIN ARENDS

Lorna C. Jansen-Varlack: Kiosconan entrega y aki un luna
doñonan por disfruta di e kiosconan nobo

Tuesday, 11 April 2017 20:30
Comparti

E kiosconan dilanti di Welcome Plaza a wordo entrega na Gobierno. E proyecto aki a wordo
financia door di FDA (Fondo Desaroyo Aruba), den e fondo aki tin placa di Aruba y Hulanda.
E proyecto aki a costa 2 miyon florin y el a wordo entrega door di sr. Anno Postma, lider di e
proyecto di Albo Aruba. Pa hopi aña e bendedonan di souvenir a wordo menosprecia y mester a
muda di un luga pa otro.
E bendedonan a pasa den situacionnan dificil, nan mester a bende for di kiosconan di palo, sin
ventilacion, awa y coriente. E comerciantenan humilde aki ta un grupo grandi cu ta contribui
diariamente na nos economia y nan tawata sinti nan mes hopi insigur pa loke ta trata un luga
fiho pa bende nan
productonan. Ora
gobernacion di AVP a bin na mando e grupo aki a muda pa kiosconan temporal cu e promesa cu
kiosconan drechi lo wordo traha pa nan den futuro. Kiosconan cu lo ta den bista di e turista. E
dia a yega cu e yabi a wordo entrega na minister Benny Sevinger cu na su turno a duna e yabi na
minister presidente Mike Eman cu a haci acto di
apertura. E kiosconan
ta super moderno unda tur e facilidadnan ta in place. Riba e plasa tambe tin un luga unda
bishitantenan y otro ciudadano por carga nan telefon of bay riba internet.
A tene cuenta cu e aspecto higienico door di traha bañonan adecua pa e bendedonan y
trahadonan. A traha mas of menos 36 kiosco unda 32 di nan lo bay pa e bendedonan.
Actualmente esunnan cu ta encarga cu e maneho di e kiosconan ta den combersacion cu e
comerciantenan pa nan wordo informa tocante di e reglanan y e contenido di e
contractnan. Esaki ta un otro promesa di gobierno cu a
wordo cumpli.
Esaki ta e vision cu Gobernacion AVP tin pa pais Aruba, un pais di cinco strea. No solamente
hotelnan, scolnan, infrastructura di cinco strea, pero tambe kiosconan di cinco strea.