Page 26 - UTILITIES

Pa 4 aña largo a keda sin cobra un florin di dividendo for di
companianan di Utilidad

Friday, 05 May 2017 16:49
Comparti

Por a tuma nota cu sr. Glenbert Croes, kende ta cuestiona constantemente cu Gobierno ta obliga WEB
Aruba NV bay fia 50 miyon florin, pa asina por hay’e y bay campaña como Gobierno. Minister Mike de
Meza a expresa, cu ora scucha politiconan bin cu storia, por duna un reaccion y contraresta esaki y el a
haci’e na diferente ocasion, cu no tin ningun peticion di Gobierno pa puntra pa ningun 50 miyon florin,
ni 40, ni 30, ni 20, ni 10 miyon florin pa WEB, pa dividend y tambe pa campaña cun’e.

E ta kere cu tin un gobernante cu ta asina loco den su cabes, absurdo pa bay busca placa na e
companianan di utilidad, pa bo core campaña cun’e. Di unda e storia ta bin, e minister no sa, pero e lo
lag’e pa responsabilidad di parlamentario Glenbert Croes mes. Un biaha mas, e ta purba di ripiti un
storia cu no tin ningun base. E por bay na director di WEB, e por bay na director di Utilities. E por bay na
Raad van Commissarisen. E por yama un reunion publico den Parlamento y de Meza lo ripiti’e for the
record, cu esey ta absurdo. No tin nada. No sa ta di kico Croes ta papia. Si tabata tin un Gobierno den
pasado cu a chica e companianan di Utilidad, ta e gobierno di MEP. Por corda na aña 2003/2004, dos
aña tras di otro a forsa e compania Elmar di bay fia 35 miyon cada aña pa duna Gobierno. Yam’e un
dividend cu no ta un dividend, pasobra no ta dividendo despues di a paga tur bo gastonan cu placa sobra
cu tin un ganashi pa duna dividend na bo accionistanan. E tabata instruccion cu a wordo poni riba Elmar
pa nan bay fia placa pa paga of duna Gobierno pa goberna riba fiansa di Elmar. E gobierno aki no tin e
pensamento ey.

Asina nan no ta goberna. Pa 4 aña largo a keda sin cobra un florin di dividendo for di companianan di
Utilidad. Awor aki nan ta pagando un parti sumamente chikito na dividendo, mescos cu tur otro
compania cu tin ganashi den Gobierno, esta companianan Estatal. Ta cifranan sumamente chikito. Nada
di compara di 35 miyon dos biaha, cu nan a cobra den pasado. E no ta berdad. Si bo tuma e periodo di
MEP, durante 8 aña, a haya na winstbelasting na dividend, banda di 250 miyon florin. Si bo no a tuma
esey y a lag’e na e clientenan, pa 8 aña largo, cada cliente di WEB por a haya bek 1000 florin pa aña pa 8
aña consecutivamente sin cu nan mester, di un forma pa otro, fia placa pe. Loke e Gobierno di MEP a
haci, ta chica 250 miyon for di companianan di utilidad y awor aki e kier bin cu tur sorto di storia. Pa e
minister de Meza, ta storianan di sprook pa mucha. E ta laga e declaracion di Croes pa su mesun
responsabilidad, pasobra ta un locura e ta.

Comentarionan (0)
Mustra/Kita comentarionan

http://www.24ora.com/index.php?option=com_content&view=article&id=121508:pa-4-ana-largo-a-
keda-sin-cobra-un-florin-di-dividendo-for-di-companianan-di-utilidad-&catid=1:local&Itemid=5