Page 27 - HOH

ORANJESTAD (AAN): Dialuna atardi SOGA (Stichting Onroerend Goed Aruba) a yama
un conferencia di prensa unda a reacciona ariba e declaracionnan di Hospital pa loke ta
proyecto di expansion y renobacion di HOH.

John Hodgson, Presidente di SOGA, a duna di conoce cu nan a tuma nota di e
declaracionnan siman pasa di e director di Hospital Ezzard Cilie como tambe un rueda di
prensa cu a wordo duna door di Minister Dangui Oduber.

Hodgson a bisa cu tur informacion cu a circula no ta cuadra cu e realidad. SOGA a
prefera di duna un reaccion, a indica, pero dialuna a dicidi di reaccion specificamente
ariba dos punto.

E prome punto ta un incidente di awa cu a drenta den Departamento di Eerste Hulp y e
di dos ta e ponencia di falta di cama pa pashent.

El a bisa cu el a pidi e project manager di SOGA, Michael Habibe, pa duna un
declaracion ariba e incidente di awa cu a drenta den departamento di Eerste Hulp.

Habibe a duna di conoce cu e incidente cu a pasa diabierna madruga, pa 2:15 am el a
haya un yamada di parti di hospital cu tin awa tabata drenta den un oficina di

administracion na Eerste Hulp pabao. A laga sa cu SOGA y HOH tin un protocol di
mantencion di tur e facilidadnan y e acuerdo ta cu ora cu tin un emergencia, esaki
mester bay via nan beheerder cu ta Crown Sevices.

Pero esey no a sosode y un bes cu a yamada no a bay pa e beheerder, e otro contact
persoon cu nan ta yama ta hospital su representante cu ta Ruben Croes. Croes ta e
persona cu a yama madruga, a señala, pa inform’e di e situacion.

Ora cu a yega HOH a constata cu tabata tin awa saliendo for di un di e oficinanan di
hospital. El a puntra dicon Crown no a wordo yama y asina a tuma accion di yama tur
e otro instancianan pa por a alivia e situacion.

A constata cu e problema tabata tin di haber cu e ‘fitting’ di un pipa di awa cu tabata
pasa eynan. Despues di mey ora a yega pa purba solucion’e. Den e proceso tabata
purba saca e awa cu tabata cay den Eerste Hulp, esaki cu yudanza di hopi hende,
Habibe a bisa.