Page 42 - VOS

FADA ta kere den nos hobennan y bayendo scolnan por mira
cu no ta tur hoben ta malo

Thursday, 23 February 2017 22:03
Comparti

For di diabierna te cu diadomingo tin actividadnan di Carnaval, su recta final. Esaki tabata un
temporada largo.

Esnan cu ta bay participa awor aki, ta bay ta hopi cansa, y lo consumi hopi alcohol. FADA ta pidi
pa por fabor, modera esaki, mantene trankil. Tin tres dia largo pa bay. E curpa ta cansa. Hopi
alcohol ta haci efecto riba bo salud. Conseho di Juendell Sprock director di FADA ta pa take it
easy. Wak pa semper bo tin bo amigo Didi Cubo y semper corda cu tin hende na cas cu ta
warda riba bo.

Na nos hobennan, hopi biaha ta mira hobennan riba caya. Nan ta cana den grupo nan ta haci
cosnan no mucho positivo. FADA semper ta kere den nos hobennan y ora cu bay scol por mira
cu no ta tur hoben ta haci cosnan malo. Mayoria ta den bon caminda. E grupo cu no ta sigui e
reglanan, FADA tey pa yuda nan. E carnaval aki ta pidi e hobennan pa ta conciente, bay poco
poco, no consumi alcohol. Bo no tin edad ainda pa haci esaki. Keda leu di tur sorto di droga.
Ora bo ta bao di influencia di droga of alcohol, bo no sa kico lo pasa y tin hopi maldad ainda
riba caya.

Sprock a splica tambe cu a haci hopi research y ta mustra cu e hobennan ta cuminsa hopi biaha
cu alcohol. Ta enfoca riba esey pasobra hopi biaha pa un hoben stap over pa bay uza droga,
hopi biaha e ta bao di influencia caba. E parti di alcohol pa FADA ta hopi importante, vooral e
hobennan cu ainda no a cuminsa uza alcohol pa por evita esaki mas hopi posibel. E chens ta
hopi mas chikito pa e hoben uza droga si e no ta uza alcohol. E ta un combinacion. Ta enfoca
sigur sigur riba droga, pero na e scolnan awor aki, vooral basico, ta focus riba alcohol, djis door
di investigacionnan cu ta mustra cu alcohol tin un influencia hopi grandi riba nos manera di
tuma decision.

Ora cu ta bao di influencia, e manera cu e persona ta wordo influencia, ta e manera mas facil
pa bay e next step pa sea uza marihuana of cocaina, cu ta un fase mas leu den e parti di
adiccion, Sprock a splica.