Page 22 - AVP
P. 22
ORANJESTAD (AAN): Aunke ta temporada di vakantie di scol,
toch DIARIO a tuma nota cu hopi docente a reacciona masha fuerte mes riba un
informacion cu a leak, mustrando cu Ministro di Enseñanza a rek faha mara aun mas
den mundo di educacion y enseñanza riba e isla.
Ministro Rudy Lampe a pone den un carta dirigi Dialuna siman pasa pa tur Directivanan
di scolnan publico, y Inspectie di Onderwijs, cu ta stop inmediatamente cu tur Overtime
di Docentenan.
Ministro a bisa cu esaki ta un medida cu e ta tuma, pasobra Gobierno di Reino y tambe
College CAft ta poniendo presion pa baha gasto di Aparato Gubernamental. Y pesey e ta
pensa di optimaliza e maneho di subsidio, y lo stop overtime.
Docentenan mesora a reacciona furioso. Nan kier sa di con Gobierno no ta haci mescos
cu e otro Diensten di Gobierno. Di con semper ta Enseñanza ta haya e hacha pa corta
tur cos.
Ministro a splica cu e ta haciendo esaki pa controla e gasto- y subsidionan pa personal
den Enseñanza. Y pesey ta bin cu medidanan per-direkt.
Medida di Lesuren: E cantidad di docentenan fulltime ta wordo subsidia a base di un
grandura di klas di 28 alumno dentro scolnan Basico y Enseñanza avanza. Tambe pa
klas di 24 alumno dentro di enseñanza di Scol Preparatorio.
