Page 15 - AAA

Clarisca Velasquez: Si Dowers no cambia maneho lo NO
sostene mas

Sunday, 05 February 2017 19:02
Comparti

"E gobierno aki ta esun cu mas a inverti den husticia...y esaki mi a boga y a aproba pe tambe.

Cu e situacion cu nos ta confronta cune di pais bisiña mi ta haya cu no ta haciendo suficiente ni na
Aeropuerto ni na waf... pasobra ainda hende indesea ta drenta pa bin haci maldad aki", asina Clarisca
Velasquez, miembro di Parlamento pa fraccion di AVP a duna di conoce. "Hendenan na cabes di
departamento clave pa nos por preveni y combati criminalidad no ta demostra integridad pa por ta na
cabes di departamentonan cu mester tin hendenan cu ta ehempel di integridad", esey tambe e
Parlamentario ta critica, insinuando precisamente den direccion di IASA, Inmigracion y Warda nos
Costa, cu de facto ta cay bou maneho ainda di Cuerpo Policia.

Ainda falta mas material na Polis y Clarisca Velasquez no sa si Minister di Husticia ta culpabel den esaki
of ta mando policial pasobra no por ta asina cu no tin suficiente auto pa Polis por haci su trabao
preventivo y esaki ta duna malhechornan mas chens pa comete crimen.

"E districtonan tur falta auto pa core patruya y esaki ta inacceptabel", na opinion di Clarisca Velasquez,
prioridadnan ta robez den mando di Cuerpo Policial. E ta haya cu ya caba mester a adapta e "jaarplan"
masha dia na e situacion cu nos isla ta confrontando cu yegada di atracadornan bisti na "turista".

E miembro di Parlamento ta convenci cu e control na aeropuerto ta fayando keto bay y mester haci algo
na esaki. Ministerio Publico tambe ta culpabel den esaki cu maneho robez pa cu listamento di hende
segun e codigo di procedimento penal pasobra den ley di droga y arma di candela e autoridad ta masha
cla y ta apto pa e situacion cu nos ta bibando aden pa laga autoridad haci uzo di su autoridad a base di e
dos leynan aki asina ta combati y preveni hopi di e atraconan cu ta cometiendo na nos isla.

Segun Clarisca Velasquez e listramento preventivo NO ta traha. Polisnan ta haciendo nan maximo
esfuero y ta detene y soluciona atraconan den forma relampago pero no por keda hiba awa lama si no
haci nada pa drecha e maneho of hefenan na aeropuerto, waf y Warda nos Costa. Aki e problema ta y
mester tin suficiente material pa Polis por haci su trabao preventivo mas optimal cual NO ta sosodiendo
awor.

Clarisca Velasquez kier mira cambio riba tur e puntonan cu el a menciona di inmediato pasobra esaki lo
yuda pa combati y preveni tur e atraconan cu ta sosodiendo riba nos isla.

"Minister Dowers ta adverti y mi ta spera cu cambio bin lihe riba tur e puntonan cu a trece dilanti sino ta
kita sosten na e Minister di Husticia", asina Clarisca Velasquez di AVP a termina bisando.