Page 80 - MIN ARENDS

agradecido na mi famia pa nan perseverancia y determinacion. Tambe mi ta agradecido na Gobierno di
Aruba pa a brinda mi e oportunidad pa sirbi nos pais y nos yiunan di tera na Hulanda durante e ultimo
tres añanan. E oportunidad aki tambe a sirbi mi di crecemento, sirbiendo y apoyando otronan den mi
funcion como Ministro Plenipotenciario na Hulanda. Sinembargo den e cambionan continuo cu ta forma
parti di nos destino, a presenta un capitulo nobo den mi bida cu a trece mi bek na mi isla natal. Hunto cu
mi esposa y famia nos pensa hopi, kico e reto nobo aki por ta significa. Mi mester bisa awe cu ta danki na
e base di union y fe cu mi a lanta cune - mescos hopi famia aki na nos isla - mi por a refleha profundo y
encontra e claridad pa compronde e reto mi dilanti. Sabiduria ta siña nos pa no bira lomba pa retonan, ni
hala atras tampoco pa oportunidad of dificultad cu por presenta.

Pesey hunto cu mi famia nos a acepta e desafio nobo aki pa mi por sirbi nos comunidad y Reino como
Gobernador. Sra. Presidente, awe mi ta reïtera na e organo mas halto di nos pais, cual ta nos Parlamento,
cu lo mi haci mi maximo esfuerso pa eherce e funcion di Gobernador dignamente, cu e mesun
dedicacion, cu mi predecesornan a eherce. Mi palabranan di profundo gratitud ta bay na nos Gobernador
saliente y awor Commandeur in de Orde van Oranje Nassau, Fredis Refunjol pa su servicio incansabel y
ehemplar na nos comunidad. Inspira pa su humildad, sinceridad y rectitud lo mi motiva mi mes pa
eherce e funcion di Gobernador di Aruba pa e periodo nos dilanti. Mi ta termina cu un mensahe na tur
famia di Aruba. Dios a brinda nos e realidad di bida cu nos por ta parti di un famia, un unidad cu
diferente relacion, sea yiu, tata, mama, ruman, primo of prima, tanta of tio, welo of wela. Nan ta diferente
rol cu durante nos bida nos por eherce, crece den dje y ser util pa nos mes, pa otronan y pa nos
comunidad. Pesey laga nos cultiva e relacionnan aki tur dia cu un amor incondicional di apoyo pa otro.
Sea ta famia of amigo, rico of pober of di cualkier rasa of religion. Hunto nos ta un comunidad, hunto nos
ta Aruba, hunto nos lo progresa. E aña nobo cu ta inicia, ta brinda nos un comienso nobo cu ta inspira
speransa, oportunidadnan nobo y entusiasmo pa vence cualkier situacion, con scur of confuso cu e por
parce di ta. Nos Creador a ekipa nos cu e cualidadnan necesario pa supera e retonan aki y ser un miho
hende pa nos famia y pa tur otro den nos comunidad. Mi ta conclui deseando un y tur un “Bon y Feliz aña
nobo 2017” y cu e deseo pa Dios por sigui bendiciona nos dushi isla di Aruba.