Page 47 - MIN ECEM

Minister dr. Alex Schwengle ta desea comunidad un fin di
aña yena cu salud y hopi amor

Monday, 19 December 2016 17:52
Comparti

Durante e fiesta di Fe y Speransa teni diaberna ultimo na Green Square, Minister di Salud, Cuido di Nos
Grandinan y Deporte, dr. Alex Schwengle a uza e oportunidad pa manda un mensahe pa comunidad.

“Prome cu tur cos mi tin cu bisa cu Fe y Speransa ta algo nobo pa’mi ya cu mi ta relativamente jong den
arena politico y mi ta hay’e un concepto hopi bunita unda ta wak un organisacion manera AVP -- un
partido politico cu kier hiba su pais dilanti -- para keto un rato pa e dianan di fiesta,” e ta refleha riba e
experiencia di e anochi. “E palabra ta dia di fiesta, pero en realidad e ta mas cu esey,” e minister di salud
ta accentua. “Ta dianan cu nos ta recorda y celebra nacemento di Cristo y nacemento di Cristo ta
nacemento di amor pasobra pa’mi Dios ta amor y esey ta loke mi ta desea pueblo,” dr. Alex Schwengle ta
accentua. E la sigui expresa su deseonan cu ta pa e pueblo tin hopi hopi amor den nan curazon y den nan
mente pasobra hopi biaha ora hendenan ta papia hopi bruto y papia hopi negativo ta pasobra cu nan no
tin amor den nan curazon… “p’esey mi ta desea e comunidad hopi amor den nan curazon,” e ta bisa bon
cla.

“Claro esaki tin cu bay compaña pa hopi salud e aña cu ta bin. Un y tur mester sa cu bon salud ta den nan
man y gobierno tey, sigur mi persona como minister di salud pa apoya nan den esey,” e ta agrega.
Siguiendo cu su mensahe e mandatario ta bisa cu tin hopi hopi cos bon den tapara. “Tabata tin hopi caba,
pero kere’mi ta bay tin hopi cos grandi y e cos cu mas nan a critica’mi riba dje -- cu rason tambe
parcialmente -- ta esun cu ta bay tin sorpresa pa nan e aña aki… deporte,” e ta accentua. “Masha danki pa
e sosten y ta spera cu e aña cu ta bin ta uno hopi mas fructifero, hopi mas salud pa nos tur,” Minister
Schwengle ta desea un y tur.