Page 43 - MIN ECEM NOV 25

Prome minister Mike Eman a tuma manifiesto for di
representante di taxistanan durante un reunion na MFA
Paradera

Thursday, 24 November 2016 21:53
Comparti

Prome Minister Mike Eman a topa cu un grupo di taxista cu ta representa mas cu 330 taxista
na MFA Paradera.

Nan tabata basta preocupa pa basta tempo. Pero a sali cu un alivio hopi grandi despues di a
reuni cu prome minister.

Segun prome minister Eman, e grupo a trece un manifiesto cu a wordo firma pa mas di 300
taxista cu tabata tin un preocupacion pa loke ta un decreto ministerial cu a wordo saca algun
siman pasa y pa nan toch nan tabata tin diferente argumento pa cual nan ta preocupa cu e
decreto ministerial aki. Gobierno a scucha naturalmente cu hopi interes pasobra, nos
taxistanan ta e prome contacto di nos pais cu nos turistanan, despues nan pasa imigracion y
Douane logicamente tambe ta e contactonan importante cu ta yama bon bini na nos
turistanan, ta sigui e ora ey nos taxistanan cu tin e turista den nan auto, ta duna nan
informacion di Aruba.

Ta importante pa nos taxistanan sinti tambe cu nan trabao ta wordo aprecia y cu nan tin
siguridad tambe pa locual ta trata nan futuro. Pa e motibo ey ta importante pa scucha nan. No
a tuma ningun decision ainda. A scucha nan cu hopi atencion y respet pasobra ta personanan
cu ta traha oranan largo, oranan di marduga tin biaha, nan ta haci hopi sacrificio pa por
percura pa entrada y pan riba mesa y pa nan ta importante pa nan tin e siguridad tambe cu ora
nan bira mas grandi of si nan fayece mes, cu tin cierto continuidad y tin cierto siguridad pa
locual ta trata nan famia. Pa Gobierno ta importante tambe pa duna reconocimento na nos
taxistanan cu nan trabao ta wordo aprecia y cu ta compronde tambe cu ora nan tin e inkietud,
ta scucha nan y esey ta locual cu a haci. Prome Minister a scuchanan cu hopi atencion y cu hopi
respet. A ricibi tambe e manifiesto cu nan a firma despues cu e decreto ministerial a sali algun
tempo pasa y a priminti nan dentro di un siman cu lo bin bek cerca nan. Lo combersa tambe cu
minister de Meza, kende tin parti di e cartera di transporte bao di dje awo, pa asina por duna e
taxistanan contesta riba e diferente inkietudnan cu nan a presenta.