Page 15 - WEB

ORANJESTAD (AAN) – Minister di Infrastructura, Medio Ambiente y Desaroyo teritorial,
sr. Otmar Oduber, a elabora den conferencia di prensa tocante e acto simbolico di
entrega di 18 truck nobo na SERLIMAR, pa recogemento di sushi na henter Aruba.

E mandatario a subraya cu e trucknan aki no solamente ta importante pa garantiza e
servicio continuo cu mester tin for di e compania nacional di recogemento di sushi y
maneho di desperdicio, pero tambe pa forma parti di un cambio structural grandi di
pensamento y caracter cu e compania tabata tin e ultimo lunanan aki, unda cu a realiza

cu e compania tin un rol sumamente importante, no solamente den e parti di ekipo y
material, pero den comprension pa comunidad, splicacionnan tocante e servicio cu
mester wordo duna y tur e tareanan cu Serlimar tin ademas di recoge sushi, unda
mester percura pa tene Aruba completamente limpi, e aceranan, e barionan, recoge

bestia morto riba caminda, corta e matanan na canto di caminda pa auto y trucknan
mes di e compania no sufri daño door di esaki, ademas di pone bakinan den bario ora
cu tin actividad pa asina eherce nan tarea di tin nos Isla totalmente limpi.

Cada un di e trucknan aki ta pa garantiza e servicio cu Serlimar ta brindando. E
mandatario kier a gradici comunidad di Aruba, pasobra cada bez cu e gobiernonan a
purba pa Serlimar haya e contribucion di comunidad y cuminza cobra pa e servicio,
semper tabata tin discusion riba esey, Pero e biaha aki comunidad a acepta e compania

nacional Serlimar, y e ultimo lunanan aki desde cu e recibonan a sali, hopi ciudadano a
yega pa cumpli cu nan responsabilidad sea ta e 25 florin of 10 florin si ta un pensionado
cu por prueba esaki, ta muestra cu pueblo tin un confianza grandi riba nos compania
nacional di recogemento di sushi.

Toldonan y barinan di sushi a cuminza wordo cambia tambe. E mandatario a señala cu
tabata tin barinan di sushi mas cu diez aña bieu rond di Aruba y cu na dado momento a
cuminza kibra, y no por a brinda e servicio y Serlimar a bin cu un proyecto cu for di

siman pasa a inicia e proceso di cambio di e barinan aki y lo sigui te cu December
venidero. Aki e minister a referi na mas cu 40 mil bari di sushi cu mester wordo
reemplaza.

E mandatario a subraya cu esaki ta costa placa, pero e campaña cu e compania ta hiba
y e mercadeo pa informa comunidad y mustre tur e trabaonan cu Serlimar ta haciendo,
ta muestra tambe di e confianza cu comunidad ta dunando bek na e compania y nan ta
cumpli cu e compromiso cu tin di paga pa luna.