Page 70 - MIN JUS

Ministernan di Korsou, St. Maarten, Aruba y Hulanda, a
comparti nan reto cu otro riba tereno di Justicia

Sunday, 29 January 2017 19:20
Comparti

Manera ta conoci cu desde e fecha conoci como 10-10-10, esta 10 di oktober di 2010, Antiyas Hulandes a
disolve y desde e fecha menciona Pais Korsou y Sint Maarten tambe tin nan status aparte mescos cu
Aruba.
E pensamento parlamentario ta cu tur tres Pais hunto cu Hulanda, ta desde dicho fecha, rumannan igual
den Reino Hulandes, mientras cu prome cu dicho fecha, tawata wak Hulanda como “madre
Patria”. Awor cu e cuatro paisnan aki ta “rumannan igual” den Reino Hulandes, a tuma nota tambe cu
den cuadro por ehempel Hudicial, tin reunionnan importante ta tuma lugar manera e asina yama
Justitieele Vierlanden Overleg, esta “JVO”, pa cu combatimento di crimininalidad. Durante e cobertura
di esaki algun siman pasa, a compronde cu tanto e minister di Justicia di Korsou como esun di Sint
Maarten, ta relativamente nobo den nan funcion y sigur cu un tarea sumamente dificil nan dilanti pa
ambos.
Hermana isla Korsou, cu ta situa mas o menos apenas 113 km leuw for di Aruba, ta conoci pa su
problematica di crimen organisa relaciona cu “gang”. E “gang” di mas grandi y organisa ta conoci bou di
e nomber “No limit Soldiers”. E grupo criminal organisa aki, ta bon conoci no unicamente pa husticia di
Korsou, pero tambe pa esnan di Hulanda y Sint Maarten, mientras cu aki na Aruba ainda e grupo di
crimen organisa aki no a logra di infiltra manera cu nan ta desea, debi na e control riguroso cu ta existi.
No obstante esaki, Aruba ta sigui di serca e actividadnan di organiscion aki, y ta brinda paisnan ruman
den Reino e sosten den combati criminalidad. Maske te ainda e influencia di “NLS” no manifesta su mes
aki banda, toch nos lo sigui tur desaroyonan di serca, pasobra no por keda sin descarta e posibilidad cu
na Aruba y den sierto bario tambe lo por tin hende involucra cu lo bay wordo deteni.