Page 39 - HOH

Segun Wyatt-Ras ta straño cu Presidente di Parlamento, Ady Thijsen ta invita tur e
instancianan urgente pa splica kico ta pasa na hospital, mientras cu ora Wyatt-Ras como
Parlamentario, hasta recientemente, puntra Minister Dangui Oduber por escrito over di
“stand van zaken” di hospital e Minister manera semper no ta contesta ni ora manda
reminder p’e. Aki si e Presidente no ta yam’e pa duna cuenta na Parlamento.

Den e invitacion p’e reunion no ta indica tampoco ta ken a pidi e reunion. Normalmente
ta Parlamentarionan ta pidi pa scucha instancianan. Ta parse cu t’e Minister a pone
Presidente, Ady Thijsen yama e reunion aki p’e por haya informacion, dor cu e no tin
contacto cu stakeholders. Presidente di Parlamento mester a yam’e mes como Minister di
Salubridad, Dangui Oduber pa duna cuenta na Parlamento.

E t’esun cu mester tin contacto cu e entidadnan p’e por splica kico ta pasando. Pero via di
e Presidente e ta uza Parlamentarionan pa haci pregunta p’e Minister por haya
informacion y argumento pa ataca e entidadnan cu no ta cay na su agrado.

Tempo e tabata Parlamentario e actual Minister tabata yora y grita den Parlamento y no
tabata kier e contratista OHL-Arellano cu a ser escogi ni tabata di acuerdo cu e proceso di
bidding di SOGA. Ni cuanto splicacion a ser duna e tempo ey den reunionnan cu e no
tabata presencia encuanto e sistema di scoring y escogencia, e Minister aki tempo e tabata
Parlamentario a bisa cu ora nan ta den Gobierno e lo a investiga. Sinembargo te dia di
awe e no a investiga ni el a haci mucho pa loke ta trata hospital.

Durante e contestanan na Parlamentarionan a resulta cu e Minister no ta duna oido den
caso di Hospital y no tin su representante den Steering Committee cu ta reuni
regularmente cu SOGA y e contratista.

Esaki ta un un fayo grandi di e Minister cu e no ta manda representante p’e ta na haltura
di e proceso di construccion y pa comunica y asina influencia of coregi e proceso di
construccion.

E gran ausente den e picture pues ta Minister Dangui Oduber. Aki por mira claramente cu
e mandatario no ta tuma rienda di su cartera, ni a sondea, ni participa, corda investiga.
Porcierto por tende den medionan di comunicacion menasa di e Minister cu “If you can’t
stand the heat get out of the kitchen” y ta anuncia cu awor lo bay haci un investigacion
forensico.