Page 40 - HOH

Ta sumamente lamentable cu e Minister aki no tabatin mucho interes pa loke ta pasa den
hospital y cu awor cu a surgi discucion e ta core menasa cu e lo investiga enbez cu el a
sinta na mesa cu e diferente partidonan den bienestar di e paciente y pueblo di Aruba.

E minister aki cu a keda pega den su rol di Parlamentario di grita den Parlamento no por
los su mes di esaki p’e sinta na mesa cu e partners den construccion den bienestar di nos
pueblo. Aruba merece mihor. Aruba merece su hospital drecha.

Aruba merece un mihor Minister cu ta scucha tur banda pa yega na otro y sigui padilanti
pa salvaguardia placa di pueblo. Ta inaceptable cu e Minister aki mes ta hinca su mes den
e “blame game”, esta e wega di culpa otro.

Wyatt-Ras ta spera cu Minister Dangui Oduber lo ta mas envolvi den e desaroyo di
hospital.
Mescos cu Parlamento mester a pone Minister di Salubridad bay sinta na mesa cu
dokternan y specialistanan den mundo medico tocante ehecucion di e ley di AruBIG,
awor lo mester mand’e bay sinta na mesa cu Hospital, SOGA y contratistanan.

Pueblo a haya necesario pa drecha nos hospital y di parti di Gobierno mester traha mas
duro pa haci esaki posibel.

Si tin diferencia di opinion mester sinta na mesa y discuti esakinan pa yega na solucion y
sigui traha paso e interes di mas importante lo mester ser salvaguardia, cual ta interes di
nos pacientenan y nos pueblo.