Page 45 - HOH

Esaki ta exactamente loke a pasa cu pueblo di Aruba, cu a haya un biga riba su cabes
pa e no mira kico a pasa cu su placa.

E crisis di awe no ta basa solamente riba e hecho cu a gasta mas placa cu tabata tin,

pero tambe riba loke a produci cu placa di pueblo.

E hecho cu awe tin hende cu ainda kier defende of sconde loke a pasa cu placa di
pueblo den construccion di e hospital nobo, ta un berguensa total. Ta un berguensa pa

scucha con ta wordo trata di papia di bon planificacion, planificacion segun contract, pa
no sigui papia di tur loke pueblo mester guli mientras a construi un hospital sin sala di
operacion.

Con un politico cu ta hura cu e ta traha na fabor di pueblo por bay hustifica cu den
planificacion a lubida riba un sala di operacion como centro di intervencion pa scapa
bida humano? Ta estupido, sin cerebro, ta considera pueblo?

Loke a pasa cu e hospital nobo di Aruba no tin nomber. E no tin aparencia di un
instituto pa cuido medico pa enfermonan, pero mas bien ta parce un institucion pa
hende bay descansa na paz pa semper.

DIARIO por a bini cu un factor determinante dilanti for di basta dia. Pero nos a spera un
rato pa mira con leu consenshi di hende cu ta yama nan mes politico por faya.

Loke ta wordo yama hospital nobo di Aruba, ta pio cu un scandal. E ta un abuso pa un

pais cu por a uza tur e placa cu a wordo gasta pa bin papia di “cinco strea” pa crea
proyectonan cu lo a yuda e pais cubri necesidadnan grandi di pueblo.

Abuso a haci cu pueblo di Aruba cu e hospital. Abuso mas grandi ta e ofensa di pueblo

cu mester scucha defensa pa institutonan cu mester tin berguensa pa enfrenta pueblo.

Ta cu bida di Aruba a hunga. Ta cu bida di Arubianonan a hunga ora a hinca tanto placa
den un proyecto cu no ta sirbi.

No por papia di un proyecto hospital, si e sala operacion a bay sconde tras di cinco
strea.