Page 3 - Djarason 5 september 2018.pdf

Djarason 5 Sèptèmber 2018 3
Ku tur probabilidat
Kaso kontra Heyliger pa
froude ku voto novèmber
awor den korte
PHILIPSBURG.- E
investigashon penal di
Ministerio Públiko kontra
lider polítiko di United
Democrats, Theo Heyliger
relashoná ku sospechonan
di a kumpra voto lo ta den
korte ku tur probabilidat
na luna di novèmber awor.
Esaki sinembargo no ta
e úniko investigashon
andando kontra Heyliger.
Segun informashonnan no
konfirmá e tim pa kombatí
kriminalidat ku ta mina, TBO
ta hasiendo un investigashon
di froude ku impuesto kontra
e mesun Heyliger. Ounke ku
no a arestá Heyliger den
e investigashon andando
riba froude ku voto, no por
deskartá e posibilidat ku
den e investigashon pa
froude ku impuesto si lo
yega e momento ku ta detené
Heyliger pa interogashon.
E investigashon di
polítikonan na St. Maarten
ta tene komunidat di e isla
den su gara. Siman pasá
e moveshon “I Stand with
St. Maarten” a tene un
marcha di protesta basta
grandi entregando kopia
di firmanan ku nan a
kolektá pa protestá kontra
e persekushon selektivo
di Ministerio Públiko
kontra polítikonan lokal. A
entregá e dokumentonan na
parlamento di St. Maarten,
na representashon di Ulanda
na Philipsburg, na Ministerio
Públiko i na Gobernadó.
Durante di e marcha e
demonstrantenan tabata
grita e lema “let our leaders
lead”.

aviso@extra.cw