Page 34 - MIN JUS_Neat

Asesinato na De Olde Molen ta habri herida fresco ainda

Sunday, 21 May 2017 14:50
Comparti

E ultimo caso di asesinato na De Olde Molen a sosode dia 7 di december 2015 pa mas o menos 4:41am, den cual a
asesina e bouncer Aldwayne C.A. Damian, naci na Aruba dia 26 di october 1978, mientras cu a tira e otro bouncer,
Freddy A. Monte, naci na Venezuela pero biba y casa basta aña caba cu un local na Aruba, cu a resulta gravemente
herida y a keda cu reto di su salud te awe.

Mester menciona cu den e caso ey, e sospechoso principal, Milangelo Trenidad, miho conoci como "Yellow" a logra
burla di autoridadnan pa algun siman prome cu porfin a logra gare, dia 15 di februari 2016 den oranan di mainta den
un cas scondi. A sigui e proceso penal den su contra, hunto cu un complice, esun cu a facilita e arma, esta Reinier vd
Berg. A acusa e ultimo pa posecion di un arma di candela.

Tratamento di e caso penal a sosode cu hopi siguridad den sala di Corte, ora cu Fiscal a pidi 18 aña di prizon pa
Yellow y 2 aña di prizon pa Reinier vd Berg. A opta pa cera "Yellow" na St. Maarten pa su mesun siguridad y riba dia
di su sentencia, esta 30 di september 2016, el a opta pa no tey den Corte na Aruba. Asina via carta a manda inform'e
cu Hues a bay di acuerdo cu demanda di Ministerio Publico y a conden'e na 18 aña y su ayudante na 2 aña di prizon.

Mester menciona cu Reinier vd Berg de facto por a sali di prizon caba, sino ta pasobra el a hinca e agresor di un
taxista den KIA, pa cual e proceso penal ey ta canando ainda of el a haya castigo adicional.

Pa loke ta e victima cu a keda na bida, Freddy Aru Monte, naci na Venezuela, a bin haye den masha reto cu su salud.
Algun dia despues cu nan a tir'e dilanti De Olde Molen, a mande Colombia pa ricibi tratamento specialisa na Clinica
Valle de Lili na Colombia. El a keda interna pa mas o menos 1 aña eyden y na december 2016 a transport'e bek pa
Aruba, unda awo e ta siguiendo cu su tratamentonan pero cu mas o menos 90% di su curpa lam y invalido. E ta na
tino si, pero a afecta henter su bida pa semper.

Mirando e susedido di awe marduga, tabata bale la pena repasa e hechonan di december 2015 y actualisa e hechonan
pa nos lectornan.