Page 28 - ARENDS

Conseho di Minister a aproba proyecto di ley pa paga
afvloeiers di SETAR

Sunday, 05 February 2017 19:11
Comparti

Despues di un procedura legal cu a dura mas cu 13 aña, Corte a dicta na fabor di e ex-empleadonan di
SETAR. Diabierna Conseho di Minister a aproba e proyecto di ley cu lo autorisa Minister di Asuntonan
Economico
y Comunicacion pa efectua e pago na ex-empleadonan di SETAR cu awor ta rumbo pa Parlamento.
Na momento cu a independisa Servicio di Telecomunicacion di Aruba na aña 2003 mas cu 90 empleado
a haci uzo di e afvloeiingsregeling den un plan social combeni durante e transicion pa SETAR N.V. E
mesun tempo a surgi un disputa entre e ex-empleadonan, sindicatonan y Pais Aruba riba e base salarial
di e afvloeiingsregeling.
E veredicto di Corte a menciona solamente un grupo di 32 ex-empleado, pero a base di esaki por conclui
cu e demas ex-empleadonan cu a haci uso di e afvloeiingsregeling e tempo ey lo wordo otorga e mesun
derechonan. “Despues cu Minister-President Eman y Minister de Meza, hunto cu sindicato SEPPA,
Gobierno di Aruba a tuma e decision di principio cu lo paga tur ex-empleado cu a haci uso di a
afvloeiingsregeling bou di e mesun condicionnan,” minister Richard Arends titular di Asuntonan
Economico y Comunicacion a splica.
“Gobierno a traha diligentemente pa prepara e proyecto di ley cu lo autorisa Gobierno pa efectua e
pagonan,” minister Arends a sigui bisa. Di e manera aki Gabinete Mike Eman II, hunto cu demas
partidonan, ta culmina un disputa hopi largo. Un disputa cu a surgi durante gobernacion di aña 2003 y
cu a causa hopi iritacion, frustracion y indignacion cerca e ex-empleadonan di Servicio di
Telecomunicacion di Aruba.
Despues cu Raad van Advies duna su conseho riba e ley, e ta wordo presenta na Parlamento di Aruba.