Page 15 - MIN ON

No ta normal cu Parlamento no ta yama Ministernan pa duna cuenta
E Minister di Asunto Social, Hubentud y Labor di nos Pais ta un sospechoso den
un caso penal na nos Pais. Esaki ta algo grandi y no ta algo normal den

gobernacion cu un Minister ta haya su mes envolvi como sospechoso den un
caso penal. Un caso asina merece atencion di Parlamento di Aruba. Pueblo

mester wordo informa na un manera oficial entre otro di kico a pasa y kico ta
bay pasa cu e trabou cu e Minister en cuestion ta responsabel pe. No por djis

bisa cu Ministerraad a dicidi. Ta na Parlamento e Ministernan mester
responsabilisa nan mes y ta e confiansa di Parlamento e Gabinete mester tin pa

por sigui cu e gobernacion. Door di keda sin yama e reunion pidi pa oposicion
pa Parlamento debati riba e caso excepcional aki, e Presidente di Parlamento ta
trapa riba democracia y riba nos Consititucion strobando e funcionamento di

Parlamento di Aruba. E actuacion iresponsabel aki di e Presidente di Parlamento
tampoco ta normal.

Gobernacion mester bay na normalidad

Locual ta pasando na Aruba den gobernacion no ta normal. Tin hopi cosnan
robes pasando y e caso di Minister Croes ta sigur un ‘dieptepunt’ pa e historia di

gobernacion di nos Pais. Nos mester evita algo asina di ripiti door di duna
contenido y concientisa tur trahador publico incluso Minister y Parlamentarionan
riba e importancia di integridad den gobernacion. Ta hustamente e falta di

integridad den Gabinete Eman ta locual a hiba nos Pais awe na conoce un caso
asina lamentabel na unda un Minister di nos Pais ta wordo sospecha di soborno

y labamento di placa.