Page 7 - KPA

AHATA ta conmociona cu crecemento recien di atraconan
arma

Thursday, 23 March 2017 22:23
Comparti

Riba diasabra dia 18 di maart dos turista a wordo atraca cu arma di candela cerca di Superfood.
Diaranson dia 22 di maart un pareha bishitante Hulandes a wordo atraca cu arma di candela cerca di Riu
Hotel
y 30 minuut despues dos bishitante a wordo atraca cu arma di candela cerca di Divi Resort. Tin entendi
cu durante di e prome seis simannan di 2017 a tuma luga 14 atraco arma mas na Aruba.
AHATA ta sumamente preocupa pa e crecemento rapido di atraconan arma y ta pidi Gobierno pa
inmediatamente ehecuta un plan efectivo pa atende e problema aki. Locual cu particularmente ta
preocupante di e dos incidentenan di diaranson anochi ta cu e malhechor no a worry pa tapa su cara.
AHATA ta compronde cu esaki usualmente ta nifica cu e criminal ta un stranhero y cu e no ta preocupa
pa camara of otro metodonan preventivo como cu e no ta den e “database” di Polis di Aruba.
Loke ta cla ta cu tin un falta general di aplicacion efectivo di leynan cu ta conduci na un medio ambiente
unda cu criminalnan ta kere cu nan por actua sin miedo di wordo gara. Esaki no ta un desaroyo recien y
AHATA a expresa su opinion riba esaki diferente biaha den pasaso, cu e situacion riba nos beachnan y
areanan den cercania a bay completamente for di man.

AHATA ta pidi pa patruyanan mas frecuente y pa recursonan adicional wordo comprometi pa atende e
crecemento inaceptabel di criminalidad. Y cu tur esfuerso wordo haci pa reforsa nos fronteranan y pa
deporta e stranheronan cu ta keda Aruba ilegalmente.
E hotelnan den tanto e area high rise como e area low rise hunto cu nan partnernan di negoshi ta sigui
inverti den e mehoracion di nan programanan di siguridad, manera camaranan CCTV y luznan adicional,
pero na fin di dia e autornan di e crimennan aki mester wordo aresta y kita for di caya.
Siguridad di tanto nos habitantenan como nos bishitantenan ta primordial si Aruba kier mantene su
reputacion como un isla sigur pa biba y bishita.
Na september 1965 a funda Aruba Hotel Association y na 1987 a bira Aruba Hotel and Tourism
Association (AHATA), cu awendia ta conta cu 90 compania miembro. Su miembresia ta varia for di
hotelnan grandi, timeshare, operadornan di tours y companianan grandi y chikito den e sector. E rol
primordial di AHATA ta pa proteha, dirigi y influencia e industria turistico di Aruba dor di sigura cu
sector publico ta aloca fondonan di "Room Tax" den forma apropia, ta inverti e suma aki efectivamente y
ta ehecuta plannan di mercadeo den forma corecto pa aumenta "rev-par" y e suma cu cada turista ta
gasta ora ta di bishita riba nos isla.