Page 46 - MIN.VOS 20 MAY 2017

Den combersacion cu e habitantenan, nan a expresa alegria p’e promesa cumpli di e
peticion cu nan a pa instalacion di luz di caya. Mescos cu e otro barionan, e otro deseo di
importante di habitantenan ta pa camindanan asfalta.

“Esaki ta un promesa tambe cu nos ta haci”, Prome Minister Eman a bisa e habitantenan.
E ta den combersacion cu Minister di Infrastructura caba riba e barionan unda cu ta hopi
urgente pa haya asfalt, unda cu no tin ningun caminda asfalta.

E bishita di e mandatario den e bario den algun caso a wordo spera y otronan el a cay di
sorpresa, unda ciudadanonan tin bes no por kere cu di berdad Prome Minister Eman ta di
bishita serca nan, manera t’e caso di Julius Hart, kende tin 40 aña bibando den e mesun
becindario, mescos cu diferente otro miembro di su famia.

“Awe ta Minister President mes a bishita’mi. Awe ta prome biaha den historia cu algo
asina a sosode aki banda. Practicamente tur esnan di pasado, a yega di pasa pero pa busca
voto y bay. Nan a priminti, pero nada a bira realidad. Mi tin 40 aña sperando un poco di
asfalt pero nada. Awo mi ta convenci cu awor si mi ta bay haya asfalt.”

Seroe Preto ta parti di bario di Paradera cu a crece basta den ultimo añanan y a conoce un
desaroyo positivo, manera por mira riba e caminda grandi. Tur esaki ta basa riba deseo
expresa dor di e habitantenan na Prome Minister durante e bishita den bario. Pesey, Hart
ta bisa, e bishitanan den bario ta algo hopi positivo cu mester keda existi. Esaki t’e forma
con pueblo por expresa nan mes na e mandatarionan.

E trabou haci dor di Gobierno ta algo cu sr. Julius Hart tin elogio p’e. Esaki tabata falta
hopi, atencion p’e barionan. Pero tambe e ta aprecia e inversionnan cu Gobierno a haci pa
futuro. “Hopi hende ta reclama cu ta gasta hopi placa, pero bo tin cu inverti pa mañan por
mira e fruto. Asina mi ta wak’e!” E ciudadano como gradicimento a regala Prome
Minister Eman un Papaya di su propio cosecha.