Page 56 - VOS

Fiesta na Departamento
di Salud Publico
relaciona cu despedida
di sra. Mary Croes

Published on March 3, 2017 in Social
ORANJESTAD, Aruba

Den sala di reunion di Directie Volksgezondheid (DVG) a fiesta despedida pa sra. Mary
M. Croes-Koolman (personeelsfunctionaris) diahuebs 2 di maart ultimo. Despues di
mas di 40 aña di servicio como ambtenaar na Directie Volksgezondheid, Mary a opta pa
bay cas hacienda uzo di su dianan di vacacion acumula pa djei disfruta di su VUT
desde dia 1 di mei 2017 y despues sigui pa pensioen.

E carera profesional di Mary desde su principio tabata na salubridad publico. Cu su 18
aña, dia 12 di augustus 1976, Mary a drenta servicio di gobierno como ambtenaar den
‘tijdelijke dienst’ den e funcion di hulpverpleegster na Gezondheidsdienst di
Eilandgebied Aruba. Na september di aña 1979 el a wordo translada pa e seccion di
Administracion Medico. Aki Mary tabata traha cu e peticionnan medico pa manda
pacientnan pa exterior. Dia 1 di juli 1982 Mary a haya su nombracion como ambtenaar
‘in vaste pensioengerechtigde dienst’. En conexion cu introduccion completo di UOAZV
dia 3 di mei 2001, despues di mas di 21 aña trahando den e seccion di Administracion
Medico, tur tarea di Mary a pasa over pa AZV y traslado di Mary pa seccion di Personal
na DVG a tuma luga.

Mary ta conoci pa ta un ambtenaar cumplido kende tabata haci su tareanan na
satisfaccion completo di su superiornan. Mary su partida for di DVG ta laga un bashi
atras pa su coleganan directo como tambe su coleganan cu a traha cu ne na DVG
desde principio di su carera. E seccion di Administracion Financiero ta bay haya su falta
tur merdia ora di lunch ya cu pa añanan largo nan ta lunch tur merdia hunto.DVG ta
desea Mary un fase di bida nobo yena cu bon salud pa por disfruta di e VUT y pensioen
bon mereci. Masha danki Mary pa bo añanan di dedicacion pa salubridad publico di
Aruba. Bo trabou desplega ta wordo aprecia pa hopi.