Page 57 - VOS

MENASA Y DESTRUCCION NA E PERLE
D’OR NA BOEGOEROEI

March 5, 2017 Leave a comment

Diasabra den oranan di mainta, patruya di Noord ta wordo manda cu urgencia pa
un caso di maltrato y robo.

Na yegada nan ta papia cu un security cu ta declara cu no tabata tin niun caso di
maltrato, pero si a surgi un problema pa via di un dama. Tur cos a cuminsa
despues cu un stagiaire kende ta bibando na Perle d’or a trece un dama den su
apartamento, cu consecuencia cu a aparece un homber basta rabia, cu a comete
destruiccion na e porta di un apartamento y a menasa e stagiaire di mat’e.

E polisnan a papia cu e stagiaire y ela splica polis cu pa mas o menos 4.45 am,
ela yega cas den compania di un dama y despues di mey ora un homber conoci
di dje ta bati na su porta, ela habri e porta paso e ta traha cu e homber na un
High Rise hotel, ora ela ripara cu e homber no tabata tin un bon intencion y
tabata acompania pa mas homber, e stagiaire a dicidi di cera e porta di e
apartamento. E homber di inicial S. a cuminsa scop e porta y a destrui e parti
abou di e porta. Segun e stagiaire, e homber S. a bin buska e dama, pero e
stagiaire no kier a splica e motibo exacto. Despues cu e porta a keda destrui a
surgi un coremento un tras di otro, den cual e dama tambe a core bay. Na
momento cu e stagiaire a mira cu tin dos homber mas cu S, ela spanta y tabata
tin miedo pa nan maltrat’e, pesey ela core bay sconde den baño di su
apartamento. E stagiaire a declara cu e homber S. a grite y a menas’e di mat’e.

E security tambe a declara cu ela mira un homber color scur colga algo na e
porta y a bise pa e para keto, e homber a core baha e trapi bay, tambe ela mira
e dama core bay den direccion di e mondi patras di e container pazuid di e
parkeerplaats di Perle d’Or. E security a mira dos homber core tras di e muher,
mientras tanto e homber di inicial S a core subi den un auto, un Grand jeep
Cherokee, donkerblauw cu plaachi number Carlos. Aparentemente e homber di
inicial S lo a menasa e security tambe cu elo mat’e.E patruya na e sitio a avisa
ambos pa pasa na warda di recherche pa entrega un keho di menasa di morto y
destruccion, mirando cu e stagiaire conoce e homber S. aki.E patruya despues di
a tuma nan declaracion a core rond den e area pa mira si nan por topa cu e
Grand Jeep Cherokee, pero no a topa cune, tambe nan a bay na e cas unda e
auto tabata registra pero e auto no tabata na e cas.