Page 63 - ATA

Mundo liber mester forsa salida di Nicolas Maduro pa por cuminsa recupera di e loke
Chavismo a laga atras pa Venezuela, continente Mericano pero tambe tur pais cu tabata
tin un laso cu Chavez y Maduro.

Debi na e laso directo entre Venezuela y OPEC, produccion petrolero a hiba henter
mundo directamente na e problemanan serio na Venezuela caminda Chavismo a uza e
sector petrolero pa haya un luga preferencial den e expansion di e cadena comunista
mundial.

Debi na e caracter humano, e exodo di Venezolanonan for di nan pais, tin e atencion
principal. Paisnan den vecindario pero tambe mas leu, mester ahusta nan propio
plannan pa por atende un demanda sumamente dificil. E bienestar di refugiadonan ya

no ta asunto di Venezuela caminda Nicolas Maduro a genera e problema, pero a bira
awor tarea di tur pais cu mester incorpora e desaroyonan den nan propio planificacion.

Ora analisa e pantaya regional, ta mira cu for di aña pasa ora a bira evidente cu Nicolas

Maduro lo causa problema serio pa siguridad regional, mundo a tuma e pasonan pa
yega na final di e epoca di dictadura di Maduro cu ta bay acompaña pa desaroyonan
serio riba tereno di crimen internacional.

Pa su sobrevivencia directo y hasta su libertad personal, Nicolas Maduro y su grupo a
uza e cadena comunista pa crea un confrontacion cu mundo liber cu a tuma medidanan
contra su regimen.

Cu entrada di Juan Guaidó, cu a haci uzo di Constitucion pa como Presidente di
Asamblea Nacional legitimamente eligi asumi poder como Presidente Interino di
Venezuela, un etapa nobo a habri pa region.

Mester tene cuenta cu ya e panorama di un guera friu a wordo introduci dor di Nicolas
Maduro cu anuncio di un base militar Ruso, cu ta cubri tambe e interes financiero di
Rusia den Venezuela.

Na e momentonan aki Venezuela pues tin tur e ingredientenan tipico di paisnan cu a
uza socialismo pa creacion di dictadura y como formula pa dirigentenan enrikece nan
mes den un sistema gubernamental dictatorial.