Page 16 - MIN JUS

Casa di doño di 297 Restaurant a recobra su libertad

Tuesday, 06 December 2016 00:05
Comparti

Na un principio Polisnan na 297 Restaurant diadomingo marduga a detene 4 persona, 1 hende muhe y 3
hende homber, di cual 1 tabata Colombiano y 3 Venezolano.
For di fuentenan bon na altura cu e caso nos a comprende cu den dia mes a laga e señora bek den
libertad, despues cu Fiscal a permiti’e paga un multa di $400 o sea 700 florin cash. E ta casa di un di e
doñonan di e Restaurant, pasobra ta saliendo na cla cu e compania tin varios doño, tanto Venezolano
como local tambe. E tres homber nan, entre otro un di e doñonan Venezolano ta sigui encarcela y
diamars mainta e lo mester mira un Fiscal y un Hues Comisario si acaso husticia opta pa prolonga nan
detencion.
E impone un cantidad di acusacion den nan contra, manera entre otro “openbaar geweldpleging”,
menasa cu morto y stroba trabou di Polis den funcion. Contra e bar tambe ta trahando un Proces-verbaal
pa mira kico Fiscal ta dicidi riba dje, teniendo cuenta cu Polisnan a yega di otorga e mesun restaurant aki
varios otro Proces-verbaal den pasado caba. Hopi bes Ministerio Publico sa acumula nan y despues duna
e doño un solo multa mas halto.
E actuacion di Polis den e restaurant a produci opinionnan mixto, pasobra de facto a scoge un pida di e
grabacion cu kisas ta cumibini e doñonan Venezolano pa pone riba internet. Pero awor cu autoridadnan
tin a video completo den nan poder y tin declaracionnan di testigonan y di e detenidonan, ta haya un
miho bista di kico a sosode den e establecimento cu a habri como un restaurant pero ta cambiando poco
poco awor pa un club nocturno habri te 3:00am.
Abogado mr. Chris Lejuez ta abogado di e doño y e trahadonan cu ta permanece encarcela na e
momentonan aki.