Page 34 - MIN VOS

Edwin Jacobs di SVB: Promedio di 700 pensionado ta
drenta pa aña den e sistema di pensioen di SVB

Friday, 09 December 2016 09:00
Comparti

Tin un ahustacion riba edad di pensioen riba AOV. Edwin Jacobs, director di SVB a splica cu prome
minister a anuncia den prensa cu e pensioen di AOV y Viuda y Huerfano lo aumenta cu 2.3%. Esaki
despues cu Gobierno a acerca SVB pa mira kico ta e espacio financiero y e espacio financiero cu na e
momento aki ta premira cu lo por duna pa e proximo 5 añanan ta e porcentahe akinan.

Hopi importante ta ora cu ta traha conseho riba un posibel aumento ta, e efectonan no solamente
riba termino cortico sino tambe termino largo. Na 2014 a cuminsa cu algun reforma di e sistema di
AOV, entre nan na 2015 a cuminsa cu edad di pensioen, ta aumenta cada mey aña. Loke ta haci cu na
e momentonan aki ta drenta den e sistema di pensioen na un promedio di 700 pensionado pa aña.
Pero ta yega momento ora cu e edad stabilisa na 65 aña manera cu ta poni den e ley actualmente, e
cantidad di persona cu lo drenta den e sistema di pensioen, lo pasa pa un promedio di 1500. Por
mira den proyeccionnan cu despues di 2024, e gastonan di e pensioen lo bay ta aumenta
rapidamente compara cu e proyeccionnan awor aki ora cu e edad subi den mita aña. A haci un
analisis. Pa loke ta trata e aña aki, a spera di lo haya mas di economia pa loke ta e prima. Na e
momento aki e realisacion di cobramento di prima ta bao di e proyeccionnan, loke ta nifica cu no lo
haya suficiente of manera cu a proyecta a base di crecemento economico cu tabata tin na prome
instante. A haci ahustacionnan si, pa loke e fondo ta bay ricibi. Asina mes ta premira cu e cantidad di
medionan di placa den e fondo lo aumenta di 15.6 miyon cash cu tabata tin den e fondo na comienso
di e aña aki y pa final di e aña aki pasa pa 30.4 miyon florin. Ora cu proyecta a base di crecemento
economico pa e proximo añanan kico ta bay spera di haya na fondo. Ta constata cu a base di esey, un
aumento di 2.3% ta un aumento cu e fondonan e momento aki por carga.

Den placa ta nifica cu e pensioen di soltero lo aumenta cu 25 florin. Y esun pa pareha lo aumenta cu
42 florin. SVB a conseha cu ta financieramente responsabel y socialmente aceptabel pa por introduci
y cu no ta trece e recuperacion di e fondo den peliger. Tin cu corda cu e fondo ta den fase di
recuperacion y di preparacion pa e momentonan caminda cu e gastonan por aumenta den e ritmo cu
e tabata tin prome cu e reformanan. Pensioen di viuda y huerfano E pensioennan di viuda y
huerfano tambe ta wordo adapta cu e 2.3%. Den e sistema di pensioen di viuda, ta un sistema mas
complica. Tin diferente tipo di pensioen pa viuda, dependiendo si e tin yiu chikito of no y tambe
depende su edad. Tur e pensioennan aki a keda adapta. Ya caba a haci e preparacionnan,
anticipando e cambionan di ley. Na e momentonan aki e leynan a cuminsa cana nan caminda caba.
Na final di December, ta paga pensioen di Januari. Aki caba lo bay haya e adaptacion aki. Segun
Jacobs, dia 28 of 29 di December, lo paga pensioen di Januari. Intencion ta cu ta pagando pensioen
dia 1 di luna y si dia 2 ta cera, ta paga prome cu dia 1. Esey ta e cambionan cu tin. Ta mustra te awor
aki cu e fondo por carga esaki.