Page 35 - MIN VOS

Importante pa tene cuenta pa duna aumento di placa na
pensionado pasobra ta nan unico entrada

Friday, 09 December 2016 08:56
Comparti

Den proyeccionnan semper ta tene cuenta cu un posibel aumento of adaptacion di e pensioen di
biehes. Esaki ta pa motibo cu e pensioen di biehes pa un gran parti di e poblacion di adulto mayor
riba nos isla, ta e unico fuente di entrada. Pa e luna di November a paga pensioen na 21 mil 76
persona, di cual 19033 ta biba na Aruba.

90% ta biba na Aruba y 7% ta biba na Hulanda. Tin un 2% ta biba den islanan di Antias Hulandes. Di
18 mil personanan aki cu ta cobra un pensioen di biehes bibando na Aruba, calculo ta cu 15 mil tin
AOV como unico fuente di entrada. Jacobs a mustra cu ora ta papia di proyeccionnan di futuro, tin
cu tene cuenta cu tin cu crea espacio pa aumenta y adapta e pensioen pa en todo caso, purba na
mantene e poder di compra di e pensioen. Pa e aña aki cu tabata tin un deflacion, loke ta haciendo ta
en principio, aumenta e poder di compra di e pensioen, cual ta otro cu mantene. Mantene lo tabata si
a adapt’e cu inflacion. Pa motibo cu no tabata tin inflacion den e periodo di 1 di Augustus, 1 di
September 2015 pa 30 di September 2016, tabata tin deflacion, e aumento aki ta nifica cu ta fortifica
e pensioen. Mester bisa cu ora ta papia di esey, cu e ultimo 15 añanan, no ta tur ora a wordo adapta
na e inflacion cu por lo tanto, e pensioen a perde su poder di compra. Esaki ta un parti di
recuperacion di poder di combra cu e pensioen a perde e ultimo 15 pa 16 añanan. Peticion pa SVB
Constantemente Jacobs ta topa clientenan di SVB riba caya, den supermercado.

Constantemente bo ta sinti e necesidad di nos hendenan pa adaptacion di pensioen. Kisas tin grupo
cu ta considera cu 25 florin of 42 florin ta poco. Pero pa e grupo cu ta depende exclusivamente di
esaki, 25 florin pa nan, ta algo cu te awor aki di e reaccionnan cu a ricibi ta cu e pensionadonan ta
satisfecho cu esaki. Si tabata tin espacio pa mas, lo por duna mas, pero na e momento aki, esaki
tabata tin espacio pe. E meta ta pa den e proyeccion pa futuro, ta tene cuenta cu ta duna adaptacion
pa pensioen, pasobra e pensioen aki ta e unico fuente di entrada. Berdad ta cu desde 2012 tin e
pensioen general pa trahado, pero e pensioen aki pa ora cu e bay duna un bon pensioen cu ta bay
complementa AOV, ta keda den añanan 30. Mientras tanto e AOV ta keda hunga e papel hopi
importante den entrada pa nos grandinan. Mester keda percura y di parti di SVB lo keda conseha
gobierno tur momento cu tin espacio pa adapta e pensioen, pa asina nos grandinan mantene nan
poder di compra y unda cu por aumenta esaki tambe.