Page 29 - MIN ARENDS

http://masnoticia.com/kvk-a-tene-un-reunion-importante-cu-cba-y-aba/

Encuanto e rol di banconan pa cu ‘e-business’ na Aruba: Kvk
a tene un reunion importante cu cba y aba

Friday, 05 May 2017 16:33
Comparti

Riba 4 di mei ultimo Camara di Comercio y Industria di Aruba (KvK) a tene un reunion cu Banco Central
di Aruba (CBA) y Asociacion di Banconan di Aruba (ABA). E motibo principal di e reunion aki ta pa trece
claridad riba e rol y responsabilidad cu banconan tin encuanto ‘e-business’.

Otro punto pa e reunion ta pa sondea e forma con banconan por facilita tanto e comerciante como e
cliente pa haci transaccion den e mundo digital. KvK a extende un invitacion na CBA y na miembronan di
ABA pa asina por sinta na mesa y hunto discuti e puntonan encuanto sistema di pago pa asina yega na
solucionnan cu ta yuda e comercio di Aruba. KvK su meta tras esaki ta pa di e forma aki representa e
comerciante local pa nan por yega na tin e posibilidad di un miho servicio na nan clientenan por medio di
un miho plataforma pa haci ‘e-business’. Actualmente na Aruba nos ta hopi atras den esaki y e topico di
‘online shopping’ no ta nada nobo. Den e ultimo aña a mira un crecemento hopi significante pa loke ta
‘online shopping’ no obstante e limitacion cu Aruba tin pa por haci ‘e-business’. KvK kier logra cu hunto
cu CBA y ABA por yega na solucionnan pa un structura di pago online cu ta accesibel, confiabel y bon
proteha contra crimen cibernetico.

Hopi comerciante ta duna di conoce cu nan ta hayanan ta perde oportunidad di haci negoshi door di nan
limitacion den e clientenan cu ta opta pa haci ‘online shopping’. KvK kier evalua hunto cu e instancianan
financiero riba e topico di e ‘red tape’ cu e comerciante ta wordo confronta cune ora cu kier habri un
cuenta comercial cerca un banco. Tambe cu e ta dura hopi largo ora di haci transaccionnan entre e
banconan. A discuti e rol cu tanto e banconan comercial como CBA tin pa asina regula e transaccionnan
cu ta costa e comerciante tempo y placa. Pa medio di e reunion KvK kier a trece e topico aki riba mesa pa
tur duna nan punto di bista riba esaki y asina yega na un solucion pa e obstaculonan aki. E reunion a bai
hopi bon y tabata uno hopi constructivo. Pronto lo sigui cu un otro reunion pa asina yega na plan di
accion concreto. KvK kier a gradici CBA y ABA pa ta presente na e reunion aki.